Topaz Premyer Liqasının 35-ci turu çərçivəsində "Xəzər Lənkəran" səfərdə "Sumqayıt"ın qonağı olacaq. Cənublular bu gündən etibarən həmin oyun üçün məşqlərə start verəcək.
Lənkəran təmsilçisində son durumla bağlı klubun mətbuat katibi Hüseyn Cəbrayıloğlunu aradıq: "İnşallah bu gündən "Sumqayıt"la matçın hazırlıqlarına başlayacağıq. Saat 18:00-da Lənkəranda komandanın məşqi olacaq. Ümumiyyətlə, hər gün 1 məşq nəzərdə tutulub. Vaxt da az qalıb. Qarşılaşma mayın 22-də keçiriləcək. Sumqayıtda da görüşdən 1 gün əvvəl oyunöncəsi məşq baş tutacaq".
Klub rəsmisi ötən tur AZAL-la oyunda zədələnən Tural Cəlilovun hazırkı durumu haqda bunları söylədi: "Cəlilovun son turda beyni silkələnmişdi. Tural müalicəsini davam etdirir. Müdafiəçinin "Sumqayıt"la görüşdə oynayıb-oynamayacağı hələ ki, sual altındadı. Həkim müayinəsindən sonra son söz söyləniləcək. Yeri gəlmişkən, komandada cəzalı futbolçu yoxdu".
Qeyd edək ki, "Xəzər Lənkəran"da Ağabala Ramazanovla Sadio Tounkara zədə səbəbindən artıq cari mövsümü erkən bitiriblər. (futbolinfo.az)
Xəbərdən istifadə edərkən istinad etmək vacibdir.
