Son çempionatı 8-ci pillədə başa vuran "Sumqayıt” növbəti mövsümün hazırlıqları üçün iyulun 1-də bir araya gələcək. Aqil Məmmədovun yetirmələri təlim-məşq toplanışının ilk mərhələsini Sumqayıtda keçəcək.
Bunu saytımıza açıqlamasında klubun meneceri Ceyhun Sultanov deyib. Onun sözlərinə görə, "gənclik şəhəri” təmsilçisi ölkəmizdəki hazırlıq prosesini başa vurduqdan sonra iyulun 15-də Türkiyəyə yola düşəcək. Ankara şəhərinin Qızılcahamam bölgəsində 10 günlük hazırlıq keçəcək "Sumqayıt” burada 4 yoxlama matçında qüvvəsini sınayacaq. Rəqiblər hələlik bəlli olmasa da, qarşılaşmaların baş tutacağı tarixlər dəqiqləşib. Belə ki, "kimyaçılar” iyulun 17, 19, 21 və 24-ü tarixlərində sınaqçı rəqibləri ilə qarşılaşacaq. İyulun 25-də isə "Sumqayıt” vətənə qayıdacaq. (futbolinfo.az)
Xəbərdən istifadə edərkən istinad etmək vacibdir.
