İlk Avropa Oyunlarında mübarizə aparan Paralimpiya Oyunlarının qalibi, "Bakı-2015"in məşəlçisi İlham Zəkiyevin SƏS TV-yə müsahibəsi:

- Avropa Oyunlarında fəxri kürsünün ən yüksək zirvəsini fəth etmiş İlham Zəkiyev oyunlara qatılarkən qələbə qazanacağına nə dərəcədə əmin idi?

- Biz inanırdıq ki, birinci yerdə qərarlaşa bilərik. Çünki hazırlığımız ona imkan verirdi. Biz orada rəqiblərimizi də tanıyırdıq. Avropanın ən güclü 8 idmançısı bu yarışlara dəvət olunmuşdu. Mən demək olar ki, onların hamısı ilə güləşmişdim və hamısını da tanıyırdım. Sadəcə olaraq məşqlərimiz ona imkan verdi ki, biz bu proqnozu verək. Beləcə qızıl qazanacağımıza ümid edirdik. Çünki Azərbaycan məndən qızıl gözləyirdi. Bizim bu yarışda uduzmağa haqqımız yox idi. Final görüşümüzdə cənab Prezident İlham Əliyev şəxsən iştirak edirdi. Təbii ki, dövlət başçısının orada iştirakı da bizə əlavə güc, stimul verdi. Hətta mən azarkeşlərin dəstəyini məxsusi vurğulamaq istərdim. Onların da əlavə güc qazanmağımızda böyük dəstəyləri oldu.

- İlk Avropa Oyunlarının qalibi kimi təltifetmə zamanı Azərbaycan Prezidenti İlham Əliyevlə olan qısa dialoqunuz mətbuatda hələ də müzakirə olunur. Bu barədə, ümumiyyətlə Prezidentlə yenidən görüşsəniz daha nələri deyərdiniz?

- Biz işimizi görürük və hər dəfə himnimiz səslənəndə, bayrağımız göylərə ucalanda fəxr edirik. Bu ilin aprelin 26-da cənab Prezident İlham Əliyev "Atəşgah”da ilk Avropa Oyunlarının məşəlini alovlandırdı. Orada mənim dövlət başçısı ilə söhbətim oldu. Mən cənab Prezidentimizə dedim ki, iyun ayının 26-sı Azərbaycan Silahlı Qüvvələr Günündə tatamiyə çıxacam və güləşəcəm. Çalışacam ki, Ali Baş Komandanmıza bir medal hədiyyə edim. Cənab Prezident və Azərbaycanın birinci xanımı, "Bakı-2015” ilk Avropa Oyunları Təşkilat Komitəsinin sədri  Mehriban Əliyeva isə məndən qızıl gözlədiklərini dedilər. Mən isə onlara dedim ki, çalışacam ki əlimdən nə gəlirsə edim. Təltifolunma zamanı isə ölkə başçısı İlham Əliyev mənə qızıl medalı təqdim edəndə ilk əvvəl onu Azərbaycan Silahlı Qüvvələr Günü münasibətilə təbrik etdim. Cənab Prezidentimizdən xahiş etdim ki, mənimlə bir yerdə kürsüyə çıxsın və xatirə şəkili çəkdirək. Sağolsun, o da mənim xahişimi yerə salmadı. Orada dövlət başçısına dedim ki, cənab Ali Baş Komandan əsgər Zəkiyev verdiyiniz döyüş tapşırığını yerinə yetirmişdir. Yəni qızıl medalı qazandım. O isə dedi ki, Azərbaycan səninlə fəxr edir, biz hamımız səninlə fəxr edirik.

- Siz həm də döyüşçüsünüz, torpaqlarımızın ərazi bütövlüyü uğrunda mübarizədə istədiyimiz nəticəni hələ də əldə edə bilməməyimiz sizi narahat etmir ki?

- Mən görmə qabiliyyətimi torpaqlarımızın müdafiəsi uğrunda itirmişəm. Bu gün mən Vətənə qulluğu idman arenasında, tatamidə davam etdirirəm. İnşAllah bundan sonra da bu davam etdirəcəm. Bildiyiniz kimi, ilk Avropa Oyunlarının açılış mərasimində məşəli alovlandıran mən oldum. İnşAllah həmin məşəli zaman gələcək biz Qarabağda alovlandıracayıq.

- Oyunlar zamanı üzləşdiyiniz maraqlı hadisələr, görüşlər, söhbətlər oldumu? Bəlkə həmin hadisələri bizlə bölüşəsiniz?

- Mənim final görüşüm Ukrayna idmançısı Aleksandr Pominovla oldu. O, birinci mərhələdə bizim idmançı Zakir Mislimova qalib gəlmişdi. İki il öncə mən həmin idmançı ilə Macarıstanda Avropa çempionatında komanda yarışının final görüşündə qarşılaşmışdım. Mən onu məğlub edəndən sonra o mənə dedi ki, İlham mən məşq edib, səni udacam. O elə bilirdi ki, bu söhbət mənim yadımdan çıxıb. Yarışdan bir gün qabaq biz çəkimizə görə tərəziyə çıxdıq. Tərəziyə çıxanda mən onun qolundan tutdum dedim ki, məni udmaq üçün yaxşı məşq etmisən? O isə zarafatca mənə dedi ki, ay İlham yaxşı bəsdi də... Final görüşündən sonra mən ona dedim ki, sən məni udmaq üçün hələ çox məşq etməlisən. O isə bunu zarafat kimi qəbul etdi. Mən I Avropa Oyunlarının açılış mərasimində məşəli alovlandırandan sonra biz orada VİP-də oturduq. Orada hamı açılış mərasiminin möhtəşəmliyindən, qeyri-adi olmasından danışırdı. Hətta onlar qeyd edirdilər ki, bu oyunlar Olimpiya səviyyəsində keçirilir. Həmin vaxt Fransadan olan cüdo üzrə London Olimpiya çempionu Lusida Post mənə dedi ki, bu gedişlə 2028-ci ildə növbəti Olimpiya Oyunları Bakıda keçiriləcək.

Mən bir daha hər kəsə təşəkkür edirəm ki, bizə oyunlar zamanı böyük dəstək oldular. Bu işdə Milli Paralimpiya Komitəsinin işini xüsusi ilə vurğulamaq istərdim. Neftçi İdman Klubu da bizə dəstək olurdu. Biz hamımız Neftçi İdman Klubunun idmançılarıyıq. Məşqçilərimizin də rolunu qeyd etmək istərdim. Baş məşqçimiz İbrahim İbrahimov və onun köməkçisi, bilavasitə mənim şəxsi məşqçim olan Elxan Rəcəbliyə minnətdaram.

- İbrahim müəllim, İlham Zəkiyevin baş məşqçisi olaraq, sonda sizin də təəssüratlarınızı öyrənmək istərdik?

- İlk Avropa Oyunlarını izləyən, bizə dəstək olan xalqımıza minnətdaram. Biz bu qələbələri onların duaları, dəstəyi sayəsində qazandıq. Məşqçinin sevinci onun idmançısının medallarıdır. İlham Zəkiyev də bizləri qazandığı qələbə ilə sevindirdi. Mən hələ də şokdayam. Sözün düzü ürəyim rahat idi ki, İlham qələbə qazanacaq, amma həyəcan həddən artıq idi. Biz İlhamla bir çox yarışlarda Paralimpiya oyunlarında, Avropa, Dünya çempionatlarında iştirak etmişik. Lakin indiyədək hələ belə həyəcan keçirməmişdim. Çox şükürlər olsun ki, həyəcan öz bəhrəsini verdi.  (sia.az)