Aleksandr Çertoqanov daha bir il futbol oynamağa qərar verib. Halbuki o, karyerasını bitirib məşqçiliyə başlamağı düşünürdü.
Lakin xeberle.com xəbər verir ki, "Sumqayıt" onu fikrindən daşındıra bilib.
Klubun baş məşqçisi Aqil Məmmədov ukraynalıdan xahiş edib ki, daha bir il onara kömək etsin. Sumqayıt klubunun prezidenti Kamran Quliyev də "Saşa"nın geri dönməsini istəyib. Hətta deyilənə görə, 35 yaşlı futbolçuya ayda 4000 manat maaş da söz verilib. Məhz bu təklifdən və isrardan sonra Çertoqanov geri dönməyə razı olub.
Qeyd edək ki, ukraynalının dönüşündən sonra kapitanlıq sarğısı Vurğundan alınaraq yenidən Çertoqanova veriləcək.
Yeri gəlmişkən, Premyer Liqanın 2015/2016 mövsümü üçün hazırlığa start verən "Sumqayıt" növbəti yoxlama oyununu keçirəcək.
Xeberle.com xəbər verir ki, Aqil Məmmədovun rəhbərlik etdiyi komanda AZAL-la üz-üzə gələcək. Artıq bu matçın keçiriləcəyi yer və vaxt da müəyyənləşib. Həmin görüş avqustun 1-də, saat 19:00-da "AZAL Arena"da start götürəcək.

Qeyd edək ki, "Sumqayıt" Premyer Liqanın ilk turunda səfərdə "Rəvan"la qarşılaşacaq.