Noyabrın 6-da Sumqayıt Paralimpiya idman kompleksində Milli Paralimpiya Komitəsi və "Azercell Telecom" MMC-nin birgə təşkilatçılığı ilə respublikada ilk dəfə olaraq Uşaq Paralimpiya İdman Oyunları keçiriləcək.

Trend-in məlumatına görə, oyunlarda respublikanın müxtəlif regionlarından olan uşaq paralimpiyaçılar 4 idman növündə (cüdo, üzgüçülük, masaüstü tennis və boccia) öz güclərini sınayacaqlar. Ümumiyyətlə, bu yarışlara 50-dən çox sağlamlıq imkanları məhdud uşaq qatılacaq.

Qeyd edək ki, beynəlxalq təcrübədə ilk dəfə olaraq Milli Paralimpiya Komitəsi saglamlıq imkanları məhdud uşaqların kütləvi şəkildə idmana cəlb olunmalarını öz himayəsinə götürərək, 2013-cü ilin sentyabr ayında Komitənin nəznində Uşaq Paralimpiya Komitəsi yaradıb. Bu komitənin yaradılmasında əsas məqsəd ehtiyat idmançıların hazırlanması ilə yanaşı, saglamlıq imkanları məhdud uşaqların abilitasiya və reabilitasiya yolu ilə cəmiyyətə inteqrasiya olunmasına dəstək verməkdir.

Respublikada Uşaq Paralimpiya Hərəkatının inkişaf etdirilməsi məqsədilə "Azercell” Telecom MMC qarşılıqlı əməkdaşlıq çərçivəsində Milli Paralimpiya Komitəsinə dəstək verir. İnformasiya dəstəyini TREND həyata keçirir.