Portuqaliyanın Odivelaş şəhərində 2016-cı il Rio-de Janeyro Yay Paralimpiya Oyunlarına son reytinq xalı qazandıran cüdo üzrə Avropa çempionatı keçirilib. Qitə çempionatında Afina və Pekin Paralimpiya Oyunlarının çempionu, dünya və beş qat Avropa, Bakı 2015 Avropa oyunlarının çempionu İlham Zəkiyev (+100 kq) bütün rəqiblərinə qalib gələrək fəxri kürsünün ən yüksək pilləsinə qalxıb. İdmançılarımızdan Rövşən Səfərov (81 kq) və Səbinə Abdullayeva (57 kq) isə finalda məğlub olaraq gümüş medala sahib çıxıblar. Hər üç idmançı "Rio – 2016” Yay Olimpiya Oyunlarına lisenziyanı təmin ediblər.

Poverliftinq.Macarıstanın Eger şəhərində poverliftinq üzrə Açıq Avropa çempionatında milli yığma komandanın üzvü Elşən Hüseynov 107 kq çəki dərəcəsində 243 kq çəki qaldıraraq dünya rekordçusu olub və gümüş medala sahib olub. E.Hüseynov 2016-cı ildə Braziliyada keçiriləcək Paralimpiya Oyunlarına vəsiqəni təmin edib.

MMA. Moldovanın Kişinyov şəhərində kişilər arasında keçirilmiş dünya çempionatında milli yığma komandanın tərkibində çıxış edən Sumqayıt idmançısı Ramil Vəliyev (78 kq) bütün rəqiblərinə qalib gələrək qızıl medala sahib olub.