Sumqayıtda Azərbaycan Respublikası Prezidenti yanında Gənclər Fondunun VII qrant müsabiqəsində qalib olan U-24 "Qadın futbolu festivalı” layihəsinə yekun vurulub.

Yarış Sumqayıt Şəhər Gənclər və İdman Baş İdarəsinin və Sumqayıt Gənclərinin Sağlam Gələcəyi təşəbbüs qrupunun birgə təşkilatçılığı ilə M.Müşfiq adına 34 nömrəli tam orta məktəbin idman zalında keçirilib.

Sumqayıt Şəhər Gənclər və İdman Baş İdarəsindən Azərtac-a bildirilib ki, mini-futbol çempionatının yarımfinal və final mərhələsinə dövlət himninin səsləndirilməsi ilə start verilib.

Layihə rəhbəri Hökumə Ağayeva və Sumqayıt Gənclərinin Sağlam Gələcəyi təşəbbüs qrupunun koordinatoru Elbrus Mirzəyev çıxış edərək ölkəmizdə uğurla reallaşdırılan idman siyasətindən, idmana və idmançılarımıza göstərilən diqqət və qayğıdan danışıblar.

Daha sonra komandalar arasında gərgin idman mübarizəsi şəraitində keçən oyunların yekunu olaraq I yerə 7 nömrəli tam orta məktəbin "Dəniz”, II yerə 26 nömrəli, III yerə isə 34 nömrəli tam orta məktəblərin komandaları layiq görülüblər.

Sonda çempionatda yer tutan komandalara və fərqlənən idmançılara sertifikat, medal və hədiyyələr, qalib komandaya isə kubok təqdim edilib.