"Kapital Bank Arena"da yenə anşlaq idi. Azarkeş əlindən iynə atsan yerə düşməzdi.
Ümumiyyətlə "Sumqayıt"ın ev oyunlarında bir qayda olaraq tribunalar dolu olur. Rəqib daha güclü komanda olunca, azarkeş sayı da ikiqat çox olur. Necə ki, "Sumqayıt" - "Qarabağ" matçında olduğu kimi.   
Matçın başlanmasına yarım saat qalmış artıq tribunalardakı bütün yerlər dolmuşdu, insanlar ayaq üstə qalmışdı. Arenaya isə insan axını davam edirdi. İnsanlar gəlir, stadionda isə bütün yerlər tutulub. Vəziyyət belə olunca klub rəhbərliyi polislərin köməyi ilə axının qarşısını kəsməyə başladı. Polislər azarkeşlərin qarşısına kəsərək onlara yer olmadığını bildirdi və geri qaytarmağa başladı.  Bu zaman isə kütlə stadionun ətrafındakı hasarlara üz tutdu. Hasarlar da dolandan sonra insanlar məyus halda geri dönməyə başladı. 
Düşünürəm ki, artıq "Sumqayıt" rəhbərliyi, komandanın sponsorları bu məsələyə bir çözüm tapılmalıdır. Camaat azarkeş deyib ağlayır. "Qarabağ" kimi komanda 4 minlik stadionun yarısını doldura bilmir.
"Qəbələ" Avropa Liqasının qrupuna kimi gedib çıxıb, amma çempionat azarkeş yığa bilmir. Yazıq "Qəbələ" rəhbərliyi o variant qalmır ki, əl atmasın. Axırda gedib orta məktəblərdən xahiş edirlər ki, uşaqlar oyunlarına gəlsin.  
Hələ biz paytaxt klublarını demirik. Siz amma, əbədi autsayder ola-ola oyunlarınıza bu qədər insan gəlir, onları qazanmaqdan itirirsiniz. "Qarabağ"la oyuna baxmaq o insanların haqqı idi. Niyə insanların əlindən o haqq alınmalıdır? Hər dəfə azarkeşləri zorla geri qaytaracaqsınız ki, yer yoxdur? Bu axı çıxış yolu deyil. Zəhmət çəkin əlavə bir tribuna tikin. Vacib deyil həmin tribuna beton tikili olsun. Dəmir konstruksiyalı iç-içə yığılıb stadiona gətirilən hazır tribunalar var. Siz də həmin tribunalardan hazırlayıb stadiona gətirin.
Necə ki, "Qəbələ" keçən il Avropa Liqasının ilk təsnifat mərhələsində həmin tribunalardan sifariş vermişdi. Siz də o cür tribunalardan quraşdırın.  Yetər ki, haqlı azarkeşin haqqı tapdalanmasın.  
Onsuz da Mehdi Hüseynzadə adına stadionun yaxın illərdə yenidən qurulması perspektivi yoxdur. "Azərkimya"nın  prezidenti Muxtar Babayev də bu yaxınlarda Sumqayıtın futbol ictimaiyyəti ilə görüşdə şəxsən bəndənizin bununla bağlı sualını cavablandırarkən etiraf etdi ki. yaxın 2 ildə bu perspektivi görmür.  
İki il sonra işlərə başlansa belə, əsas stadionun  hazır olması daha iki il vaxt alacaq. Bu isə onu göstərir ki,  ən azı yaxın dörd ildə Sumqayıt azarkeşləri "Kapital Bank Arena"nın ümidinə qalacaq. Demək ki, bayaqa qeyd etdiyim kimi, bu problemə bir çözüm tapılmalıdır. Yetər ki, haqlı azarkeşin haqqı tapdalanmasın.  
Baş katib Elxan Məmmədov "Sumqayıt"a tövsiyyə edib ki, bilet satışı həyata keçirsinlər. Amma baş katib başa düşmür ki, bu, çıxış yolu deyil. Sumqayıt kimi yarım milyonluq şəhərdə istənilən halda 1300 nəfər insan tapılacaq ki, 1 manat verib bilet alsın. Bəs qalanları neyləyəcək? Yenə nə qədər insan qapı arxasında qalacaq, narazı halda polislər tərəfindən geri qaytarılacaq.  
Bir daha deyirəm, "Sumqayıt" rəhbərliyi, klubun sponsorları təcili olaraq "Kapital Bank Arena"da yeni tribuna quraşdırmalıdır. Əgər komanda yaradıb, komanda saxlayıb, adının qarşısında "peşəkar" sözünü yazmısınızsa  o zaman bu ada da əməl etməyə məcbursunuz. Digər klublar  bütün cəhdlərdən istifadə edir ki, azarkeş toplasın. Siz amma öz ayağı ilə oyunlarınıza gələn azarkeşləri futboldan küsdürürsünüz.  Bu isə yolverilməzdi.
Rekord.az