Bu gündən etibarən "Xeberle.com” saytı olaraq "Sumqayıt” Futbol Klubu ilə birlikdə "Topla PARİSƏ DOĞRU: AÇ-2016”rubrikasına start veririk. Bu rubrika çərçivəsində iyunun 10-da Fransada başlayacaq Avropa çempionatının iştirakçılarını oxucularımıza yaxından tanıtmağa çalışacağıq. Silsilə yazılara A qrupunda yer alan Fransa millisi ilə start veririk.

Fransa milli komandası doğma meydandakı Avropa çempionatının əsas favoritlərindən hesab olunur. Düzdür, 1998-ci ildə dünya, bundan iki il sonra Avropa çempionu olan "xoruzlar” son illərdə ciddi uğur qazana bilmir, amma bununla belə, Didye Deşamın "drujinası”nı sıradan komanda saymaq olmaz. Komanda yoldaşı Matyu Valbuenanı şantaj etməkdə günahlandırılan və bu səbəbdən millidən kənarlaşdırılan Madrid "Real”ının hücumçusu Kərim Benzema, məşqçinin etimadını qazanmayan "Bavariya”nın ulduz oyunçusu Frank Riberi, "Atletik” (Bilbao) klubunun müdafiəçisi Emerik Laporte, mövsümü "Bordo”da keçirən Matye Debuşi və "Çelsi”nin üzvü Kurt Zumanın zədə səbəbindən baş məşqçinin sərəncamında olmaması Fransa yığması üçün ciddi itkilər sayılsa da, nəsildəyişmə prosesini sürətlə arxada qoyan komanda əsasən gənclərdən təşkil olunan güclü heyətə malikdir. Son illərdə Rafael Varan, Pol Poqba, Elyakim Manqala, Antuan Qrizmann, Aleksandr Lakazet, Matye Valbuena və Antoni Marsial kimi oyunçuların üzə çıxması Deşamı sevindirməyə bilməz. Amma Rafael Varanın zədə səbəbindən AÇ-dən kənarda qalma ehtimalı da var.

Meydan sahibi olduğundan turnirə seçmə mərhələdə çıxış etmədən qatılan fransızların çempionata nə dərəcədə hazır olması bəlli deyil. Heyəti və taktikanı yoxlama matçlarında sınaqdan keçirən Didye Deşamın komandasının hazırkı vəziyyəti haqqında yalnız bu qarşılaşmalar çərçivəsində fikir yürütmək mümkündür. Son iki hazırlıq oyununda Hollandiya (3:2) və Rusiyanı (4:2) üstələyən "xoruzlar”ın məhsuldarlığı meydan sahibəri üçün nikbinlik mənbəyidir.

Fonten, Platini və Zidan

Fransa milli komandası ilə bağlı ən diqqətçəkən məqam üçrənglilərin uğurlarının müəyyən dövrlərdə kollektivdə çıxış etmiş ulduzların adları ilə bağlı olmasıdır. 1958-ci ildə Jüst Fonten, 1986-cı ildə Mişel Platini, 1998-ci ildə isə Zinəddin Zidan kimi oyunçular Fransa yığmasını araxasınca aparmaqla "üçrənglilər”ə beynəlxalq arenada uğurlar qazandırmışdı. Fonten və Platininin dövründə dünya çempionatının bürünc, Zidanın zamanında isə qızıl medal qazanan "xoruzlar” xüsusən sonuncunun dövründə əzəmətli, fərqli oyun üslubu ilə seçilən qarşısıalınmaz komanda hesab olunurdu. Amma sözsüz, indi bu epitetləri Fransa millisinə yaraşdırmaq olmur. Məsələ burasındadır ki, hazırkı komandada liderlik bacarığı ilə seçilən sima yoxdur. Ancaq həm dünya, həm qitə səhnəsindəki ilk böyük uğur evdə qazanıldığından meydan sahibləri Fransa-1984 və Fransa-1998-dəki zəfərlərin ardını gətirməyə iddialıdır.

23-ü əsas, 8-i ehtiyat

Avropa çempionatı ərəfəsində maraqla gözlənilən məqamlardan biri də komandaların qitə birinciliyinə hansı heyətlə yollanacağı idi. Artıq turnir iştirakçılarının əksəriyyətinin AÇ-2016-da hansı oyunçulara güvənəcəyi bəllidir. Haqqında danışdığımız Fransa yığmasının da geniş heyəti bugünlərdə ictimaiyyətə təqdim olundu. Sərəncamına ümumilikdə 31 oyunçu dəvət edən Didye Deşam onlardan 8-ni ehtiyat heyət üzvü kimi heyətə cəlb edib. Fransa yığmasının düşərgəsində dəvət edilən oyunçuların tam siyahısı isə aşağıdakı kimidir:

Qapıçılar:Huqo Lloris ("Tottenhem”), Stiv Mandanda ("Marsel”), Benuo Kostil ("Renn”)

Müdafiəçilər:Lyuka Din, Loran Kosielni (hər ikisi "Arsenal”), Patris Evra ("Yuventus”), Eliakim Manqala, Bakari Sanya (hər ikisi "Mançester Siti”), Kristof Jalle ("Lion”), Rafael Varan ("Real”), Jeremi Matye ("Barselona”)

Yarımmüdafiəçilər: Yohan Kabaye ("Kristal Palas”), Lassana Diarra ("Marsel”), Blez Matuidi (PSJ), Pol Poqba ("Yuventus”), Nqolo Kante ("Lester”), Musa Sissoko ("Nyukasl”)

Hücumçular:Andre-Pyer Jinyak ("Tiqres”), Dmitri Paye ("Vest Hem”), Olivye Jiru ("Arsenal”), Antuan Qrizman ("Atletiko”), Kinqsli Koman ("Bavariya”), Antoni Marsyal ("Mançester Yunayted”)

Ehtiyat oyunçular: Alfons Areolya ("Vilyareal”), Cibril Sidibe ("Lill”), Samuel Umtite ("Lion”), Morqan Şneyderlin ("Mançester Yunayted”), Adrien Rabyo (PSJ), Hatem Ben Arfa ("Nitsa”), Aleksandr Lakazet ("Lion”) və Kevin Qameyro ("Sevilya”)

AÇ iştirakçısı bizə qarşı: Tarixə düşən Oser faciəsi

AVRO-1996-nın seçmə mərhələsindən beynəlxalq arenada yarışlara qatılan milli komandamız həmin vaxt Fransa seçmə komandası ilə eyni qrupda yer almış və hər iki qarşılaşmada meydanı məğlub tərk etmişdi. O vaxt oyunlarını Türkiyənin Trabzon şəhərində keçirən Azərbaycan yığması ilk oyunda rəqibinə 0:2 hesabı ilə uduzmuşdu. Fransanın Oser şəhərində keçirilən cavab matçında isə meydan sahibləri komandamızın qapısına 10 cavabsız qol vurmuşdu. Məlumat üçün bildirək ki, futbol tariximizdə "Oser faciəsi” kimi düşmüş oyunda qeydə alınan nəticə Fransa milli komandasının rəsmi oyunlardakı ən böyükhesablı qələbəsidir.

Fransa əvvəlki Avropa çempionatlarında:

1960 – IV yer

1964 – final mərhələsinə yüksələ bilməyib

1968 – final mərhələsinə yüksələ bilməyib

1972 – final mərhələsinə yüksələ bilməyib

1976 – final mərhələsinə yüksələ bilməyib

1980 – final mərhələsinə yüksələ bilməyib

1984 – Çempion

1988 – final mərhələsinə yüksələ bilməyib

1992 – Qrupda qalıb

1996 – III yer

2000 – Çempion

2004 – 1/4 final

2008 – Qrup mərhələsi

2012 – 1/4 final

AVRO-2016-da oyunları:

10 iyun. 23:00. Fransa – Rumıniya

15 iyun. 23:00. Fransa – Albaniya

19 iyun. 23:00. İsveçrə - Fransa

Tural Məmmədov
Xeberle.com