"Topla PARİSƏ DOĞRU: AÇ-2016” adlı layihəsində silsilə yazılara A qrupunda yer alan Rumıniya millisi ilə davam edirik. Layihə "Xeberle.com” saytı və "Sumqayıt” Futbol Klubu tərəfindən təqdim edilir.



Bəlkə də Rumıniya milli komandasının Avropa çempionatının iştirakçıları sırasında olmasını böyük uğur sayanların sırası genişdir. Bunu həm sözügedən yığmanın indiyədək ciddi uğur qazanmaması ilə, həmdə komandanın əvvəlkdən daha zəif olması ilə əlaqələndirənlər az deyil. Avropa çempionatında ən yaxşı halda ən yaxşı 8 komanda arasında yer ala bilən "üçrənglilər”in ilk və tək belə uğurundan düz 16 il ötür. Düzdür, o vaxt da komandaya hazırkı çalışdırıcı Angel Yordanesku rəhbərlik edirdi və bu amil istər-istəməz yerli azarkeşlərin uğura olan inamını artırır. Amma həmin vaxt məşqçinin sərəncamında Georgi Hacı, Dan Petresku, Marius Leketuş, Georgi Popesku və Adrian İlie kimi tanınmış simalar var idisə, indiki halda komanda bu cür istedadlardan ibarət deyil.

"53-lüy”ün seçiləni

Rumıniya yığması Avropa çempionatının seçmə mərhələsində 10 oyunda cəmi 11 dəfə fərqlənsə də, Fransaya qrup ikincisi kimi yollandı. Sözsüz ki, "sarılar” bu uğuru etibarlı müdafiə xəttinə borcludur. Məsələ burasındadır ki, seçmə mərhələdə çıxış edən 53 komanda arasında hamıdan az qolu məhz "karpat uşaqları” buraxıb. Bu baxımdan rekordçu olan yığma səfərdəki beş matçda ümumiyyətlə qapısını toxunulmaz saxlamış, 10 oyunda cəmi iki qol buraxmaqla diqqət çəkmişdi.

"Qəbələ”nin sabiq üzvü Rumıniya yığmasında

Təxminən 10 gün əvvəl Rumıniya milli komandasının baş məşqçisi Anxel Yordanesku Avropa çempionatı üçün komandasının 28 futbolçudan ibarət ilkin heyətini açıqladı. Maraqlıdır ki, milliyə çağırılanların sırasında vaxtilə Azərbaycan çempionatında çıxış etmiş oyunçu da var. Belə ki, 2014-2015 mövsümündə "Qəbələ”nin formasını geyinmiş Adrian Ropotan da yığmaya dəvət alıb. Ümumilikdə isə siyahıda aşağıdakı oyunçuların adı var:

Qapıçılar: Çiprian Tataruşanu ("Fiorentina”, İtaliya), Kostel Pantilimon ("Uotford”, İngiltərə), Silviu Lunq ("Astra”).

Müdafiəçilər: Kristian Sapunaru ("Panduriy”), Aleksandru Matel ("Dinamo”, Xorvatiya), Vlad Çiriçeş ("Napoli”, İtaliya), Valerika Qaman ("Astra”), Kosmin Moti ("Ludoqorets”, Bolqarıstan), Draqoş Qriqore ("Əl-Sailiya”, Qətər), Razvan Rat ("Rayo Valyekano”, İspaniya), Steliano Filip ("Dinamo”), Alin Toşka ("Styaua”)

Yarımmüdafiəçilər: Mixay Pintiliy, Adrian Popa, Aleksandru Çipçiu, Nikolae Stankiu (hamısı "Styaua”), Ovidiu Hoban ("Hapoel”, Beer Şeva, İsrail), Adrian Ropotan ("Panduriy”), Andrey Prepeliţa ("Ludoqorets”, Bolqarıstan), Qabriel Torxe ("Osmanlıspor”), Aleksandru Maksim ("Ştutqart”, Almaniya), Lusian Sanmarten ("Əl-İttihad”, Saudiyyə Ərəbistanı).

Hücumçular: Klaudiu Keșeru ("Ludoqorets”, Bolqarıstan), Boqdan Stanku ("Gənclərbirliyi”, Türkiyə), Florin Andone ("Kordoba”, İspaniya), Denis Alibek ("Astra”), İoan Hora ("Panduriy”), Andrey İvan ("Universitetia Krayova”).

AÇ iştirakçısı bizə qarşı: Debütümüzü korlayanlar

Rumıniya seçmə komandası bizə yaxşı tanışdır. Belə ki, 1994-cü ilin payızında beynəlxalq arenada debüt edən milli komandamızın Avropa çempionatının seçmə mərhələsindəki ilk rəqibi məhz Rumıniya olmuşdu. Buxarestdə üç cavabsız qolla üç xal qazanan "üçrənglilər” o vaxt ev oyunlarını Türkiyənin Trabzon şəhərində keçirən millimizlə cavab matçında da üç top fərqi ilə qələbəyə sevinmişdi. Bu dəfə yığma komandamızı dörd dəfə cəzalandıran Angel Yordaneskunun yetirmələri Nazim Süleymanovun qoluna əngəl ola bilməmişdi.

Rumıniya ilə ilk Bakı qarşılaşması isə AVRO-2000-nin seçmə mərhələsinə təsadüf etmişdi. Həmin vaxt paytaxtda Rumıniya seçmə komandasına minimal hesabla uduzan Azərbaycan yığması səfərdə isə 0:4 hesabı ilə məğlub olmuşdu.

Rumıniya əvvəlki Avropa çempionatlarında:

vvəlki Avropa çempionatlarında:

1960 – final mərhələsinə yüksələ bilməyib

1964 – final mərhələsinə yüksələ bilməyib

1968 – final mərhələsinə yüksələ bilməyib

1972 – final mərhələsinə yüksələ bilməyib

1976 – final mərhələsinə yüksələ bilməyib

1980 – final mərhələsinə yüksələ bilməyib

1984 – Qrup mərhələsi

1988 – final mərhələsinə yüksələ bilməyib

1992 – final mərhələsinə yüksələ bilməyib

Məlum olduğu kimi, Rumıniya milli komandası turnirin açılış matçında meydan sahibi olan Fransa yığması ilə qarşılaşacaq. İlk oyunda uğurlu nəticə əldə olunsa, "sarılar” işini xeyli asanlaşdıracaq. Ən azı ona görə ki, Angel Yordaneskunun "drujinası” üçün qrupun digər iki komandası ilə mübarizə aparmaq daha asandır. Həm İsveçrə, həm də turnirin debütüntı Albaniya yığmasının Rumıniya üçün münasib rəqib olmasını demək artıqdır.

AVRO-2016-da oyunları:

10 iyun. 23:00. Fransa – Rumıniya

15 iyun. 20:00. Rumıniya – İsveçrə

19 iyun. 23:00. Rumıniya – Albaniya

Tural Məmmədov
Xeberle.com