"Topla PARİSƏ DOĞRU: AÇ-2016” adlı layihəsində silsilə yazılara B qrupunda yer alan Uels millisi ilə davam edirik. Layihə"Xeberle.com” saytı və"Sumqayıt” Futbol Klubu tərəfindən təqdim edilir.

Bu komanda sonuncu dəfə 1958-ci ildə keçirilən dünya çempionatında iştirak etmək hüququ qazanmışdı. Söhbət Avropa çempionatında B qrupunda mübarizə aparacaq Uels millisindən gedir. Ondan sonra geridə qalan 58 ildə nə dünya nə də Avropa çempionatında yer almağı bacarmayan "əjdahalar” nəhayət ki, AVRO-2016-da istəyinə çatdı. Seçmə mərhələdə Belçika kimi güclü kollektivdən dörd xal almaqla diqqətləri üzərinə çəkən Uels yığmasının qrup mərhələsindəki yeganə məğlubiyyətini Fransaya vəsiqəni təmin etdikdən sonra alması da nəzərdən yayınmadı.

Beyldən asılı olan komanda

Şübhəsiz ki, Uels milli komandasının əsas lideri Qaret Beyl hesab olunur. Seçmə mərhələdə 11 dəfə fərqlənən britanıyalıların 7 qolunun müəllifi olan Madrid "Real”ının üzvü iki halda isə komanda yoldaşlarına məhsuldar ötürmə vermişdi. Maraqlıdır ki, Rayan Giqqz, Nevil Sauthol, Yan Raş kimi tanınmış oyunçuların çıxış etdiyi dönəmdə daha çox komanda oyunu ilə seçilən yığma indi az qala bütünlüklə Beyldən asılıdır.

Uels necə oynayacaq?

Uels yığması ilə bağlı ən diqqətçəkən məqamlardan biri komandanın beş müdafiəçi ilə çıxış etməsidir. Sərəncamında yüksək səviyyəli müdafiəçilər olduğundan baş məşqçi Kris Koulmen daha çox müdafiə futboluna üstünlük verir. Onun seçdiyi taktiki sxem "Arsenal”lı Aaron Remsinin dəqiq ötürmələri və Beylin sürəti isə əks-hücumlar üçün yaxşı imkan yaradır. Britaniyalıların Fransada da məhz bu cür oyun üslubunda çıxış etməsi gözləniləndir. Qapısını Ueyn Hennessi qoruyan komandanın arxa xəttində adətən Eşli Uilyams, Ceyms Çester, Ben Devis, Nil Teylor və Kris Qanter yer alır. Orta xəttin mərkəzində əksər hallarda Co Ledli, Co Allene və Aron Remsi forma geyir. Qaret Beyl isə komandanın sərbəstlik verilən simasıdır. Komandanın qol silahı isə İngiltərə "Ridinq”inin üzvü Hal Robson-Kanu sayılır.

Uels əvvəlki Avropa çempionatlarında:

1960 – iştirak etməyib

1964 – final mərhələsinə yüksələ bilməyib

1968 – final mərhələsinə yüksələ bilməyib

1972 – final mərhələsinə yüksələ bilməyib

1976 – final mərhələsinə yüksələ bilməyib

1980 – final mərhələsinə yüksələ bilməyib

1984 – final mərhələsinə yüksələ bilməyib

1988 – final mərhələsinə yüksələ bilməyib

1992 – final mərhələsinə yüksələ bilməyib

1996 – final mərhələsinə yüksələ bilməyib

2000 – final mərhələsinə yüksələ bilməyib

2004 – final mərhələsinə yüksələ bilməyib

2008 – final mərhələsinə yüksələ bilməyib

2012 – final mərhələsinə yüksələ bilməyib

Beyl yığmadan kənar qaldı

Uels milli komandasının baş məşqçi Kris Koulmenin AVRO-2016 üçün açıqladığı ilkin heyətdə Qaret Beyl adının olmaması çoxlarına təəccüblü gəlsə də, bu, heç də komandanın liderinin məşqçinin etimadını qazanmaması ilə bağlı deyil. Belə ki, Madrid "Real”ının üzvü zədəli olduğundan 29 nəfərlik heyətdə yer almır. Onun son durumuna Çempionlar Liqasının final matçından sonra aydınlıq gələcək. AVRO-2016-ya yollanacaq 23 nəfərlik yekun heyəti mayın 31-də açıqlamağı planlaşdıran Kris Koulmen hələlik isə aşağıdakı oyunçuları toplanışa cəlb edib:

Qapıçılar: Ueyn Hennessi ("Kristal Pelas”, İngiltərə), Danni Uord ("Liverpul”, İngiltərə), Oveyn Fon Uillyams ("İnverness”, Şotlandiya)

Müdafiəçilər: Ben Deyvis ("Tottenhem”, İngiltərə), Neyl Teylor, Eşli Uillyams (hər ikisi "Suonsi”), Kris Qanter ("Ridinq”, İngiltərə), Ceyms Çester ("Vest Bromviç”, İngiltərə), Eşli Riçards ("Fulhem”, İngiltərə), Pol Dammett ("Nyukasl”, İngiltərə), Adam Henli ("Bləkbörn”, İngiltərə), Adam Mattyu ("Sanderlend”, İngiltərə), Ceyms Kollins ("Vest Hem”, İngiltərə)

Yarımmüdafiəçilər: Aron Remsi ("Arsenal”, İngiltərə), Co Ledli, Conatan Uillyams (hər ikisi "Kristal Pelas”, İngiltərə), Devid Von ("Nottingem Forest”, İngiltərə), Co Allen ("Liverpul”, İngiltərə), Devid Kotterill ("Birmingem”, İngiltərə), Corc Uillyams ("Fulhem”, İngiltərə), Endi Kinq ("Lester”, İngiltərə), Emir Hyus ("Viqan”, İngiltərə), Devid Edvards ("Vilverhempton”, İngiltərə)

Hücumçular: Hal Robson-Kanu ("Ridinq”, İngiltərə), Sem Uokes ("Bernli”, İngiltərə), Tom Bradşou ("Uolsoll”, İngiltərə), Tom Lourens ("Lester”, İngiltərə), Simon Krauç ("Nottingem Forest”, İngiltərə), Ues Börns ("Uolsoll”, İngiltərə).

AÇ iştirakçısı bizə qarşı: Kapitanın məyus etdiyi rəqib

Uels millisi Azərbaycan yığması ilə ümumilikdə dörd dəfə qarşılaşıb ki, bütün oyunlar da rəsmi xarakter daşıyıb. İlk dəfə AVRO-2004-ün seçmə oyununda 2002-ci ilin noyabrında Bakıda qarşılaşan komandaların matçında qonaqlar 2:0 hesabı ilə qalib gəlmişdi. Bu görüşdən dörd ay sonra Kardiffdə üzləşən tərəflərin ikinci matçında da Uels qalib gəlmiş və bu dəfə 4:0-lıq nəticə qeydə alınmışdı.

Uels yığmasının ikinci Bakı səfəri isə qonaqlar üçün uğursuz olmuşdu. DÇ-2006-nın seçmə mərhələsi çərçivəsində 2005-ci ilin sentyabrında bizə rəqib olan britanyalılar paytaxtımızda xal itirmişdi. Milli komandamızın kapitanı Rəşad Sadıqovun cərimə zərbəsindən cəzalandırdığı qonaqlar sonda bir xalla kifayətlənmişdi. Həmin seçmə mərhələdəki cavab matçında isə Uels yığması komandamızın qapısına iki cavabsız qol vurmaqla qalib gəlmişdi.

AVRO-2016-da oyunları:

11 iyun. 20:00. Uels – Slovakiya

16 iyun. 17:00. İngiltərə - Uels

20 iyun. 23:00. Rusiya – Uels

Tural Məmmədov