Ukrayna millisi tarixi ərzində ikinci dəfə Avropa çempionatına qatılsa da, ilk dəfədir seçmə mərhələ səddini aşmaqla turnirə qatılır. Buna qədər isə sonuncu Avropa çempionatında meydan sahibi kimi qitənin ən önəmli futbol forumunda yer almışdı. Düzdür, daha öncə də "göy-sarılar” buna yaxın olmuşdu, ancaq sonda hədəfə çatmaq mümkün olmamışdı. Məsələn, 16 il əvvəl ukraynalılar son anda belə şansı qaçırmışdılar. Həmin vaxt seçmə mərhələsinin son oyunundakı 1:1 hesablı heç-heçə ilə AVRO-2000-ə qrup birincisi kimi yollanmaq şansı əldən verilmişdi. Ardınca isə pley-offun Sloveniya ilə qarşılaşmalarında hər şey sonda məhv oldu. Sloveniyalıların 78-ci dəqiqədəki qolu Ukrayna yığmasının final mərhələsindəki debütünə imkan verməmişdi. Bu dəfə iştirakçıların sayının 24-ə çatdırılmasından yararlanan Fomenko və yetirmələri tarixində ilk dəfə pley-offda qalib gəldi. Hərçənd bunadək tilsimləmən raundda 5 dəfə uduzan ukraynalılar final mərhələsinin bir addımlığında dayanmağa az qala adət etmişdi.

Konoplyankanın ətrafında birləşən kollektiv

Şübhəsiz, Ukrayna deyən kimi birinci Şevçenko yada düşür, amma hazırda millinin məşqçisi kimi çalışan keçmiş forvardın səhnədən çəkilməsindən xeyli vaxt ötür. Elə son dönəmlərdə yığmanın şərəfini qoruyan Varonin, Milevski və s. kimi tanınmış adlar da indi komandanın sıralarında deyil. Amma buna baxmayaraq, milli komanda stabil heyəti ilə diqqət çəkir. Komandanın ən önəmli siması isə Yevgeni Konoplyankadır. Hətta bir ara "Sevilya”nın üzvü adından xeyli söz etdirməyi bacarmışdı. Xüsusən sağ ayağı ilə əla zərbələri olan futbolçunun transfer dəyərini Xuande Ramos 50 milyon avro olaraq qiymətləndirmişdi. Maraqlıdır ki, bundan sonra ölkəsində Yevgeniyə "mister 50 milyon” deməyə başlamışdılar. İndi bütün Ukrayna Konoplyankadan komandanı arxasınca aparmağı gözləyir.

Hücumçu problemli yığma

Komandanın qapısını seçmə mərhələ boyu "çərçivə”də olan Andrey Pyatov qoruyur. Cari mövsümdə Türkiyə "Beşiktaş”ında ehtiyatda qalan Denis Boykonun Pyatovla rəqabət aparacaq gücdə olmadığı gün kimi aydındır.

Müdafiənin sağında Artyom Fedetski, solunda Vyaçeslav Şevçukun yeri şühbə doğurmur. Mərkəzdə isə Yaroslav Rakitski və Yevgeni Xaçeridi çıxış edir. Dayaq yarımmüdafiəçisi mövqeyində təcrübəli Taras Stepanenkoya daha çox etimad göstərilsə də, Sergey Rıbalka, Denis Qarmaş, Sergey Sidorçuk onu layiqincə əvəzləmək gücündədilər. Onlardan biri mərkəz yarımmüdafiəçisi kimi Ruslan Rotanla yanaşı da çıxış edir. Yarımmüdafiənin cinahları isə Yarmolenko ilə Konoplyankanın ixtiyarına verilir. Komandanın çalışdırıcısı Mixail Fomenkonu ən çox hücum xətti narahat edir. Seçmə mərhələdə 3 qol vuran Artyom Kravets klubunda da oyun praktikası sarıdan korluq çəkir. O, ümumiyyətlə də yığmanın əsas qol ümidi sayıla biləcək hücumçu deyil. Ancaq iş orasındadır ki, Filipp Budkovski və Roman Zozulya da bu mövqedə istəniləni vermir.

Yevgeni Seleznyov kənarda qaldı

Ukrayna yığmasının heyətindən danışmışkən, artıq komandanın Avropa çempionatı üçün ilkin heyəti açıqlanıb. Baş məşqçi Mixail Fomenko 27 oyunçuya dəvət göndərib. Ən diqqətçəkən məqam "Şaxtyor”un hücumçusu Yevgeni Seleznyovun çağırılanlar arasında yer almamasıdır. Ümumiyyətlə, milliyə ən çox oyunçu verən klub məhz "Şaxtyor”du. Donetsk təmsilçisinin 7 üzvü qitə birinciliyinə yollanmaq imkanı qazanıb. Kiyev "Dinamo”sunun isə 6 oyunçusu milliyə çağırılıb.

Qapıçılar: Denis Boyko ("Beşiktaş”, Türkiyə), Andrey Pyatov ("Şaxtyor”), Nikita Şevçenko ("Zarya”)

Müdafiəçilər: Artyom Fedetski ("Dnepr”), Yevgeni Xaçeridi ("Dinamo”), Boqdan Butko ("Amkar”), Nikita Kamenyuk ("Zarya”), Aleksandr Kuçer, Yaroslav Rakitski, Vyaçeslav Şevçuk (hamısı "Şaxtyor”)

Yarımmüdafiəçilər: Ruslan Rotan, Yevgeni Şaxov (hər ikisi "Dnepr”), Oleq Qusev, Sergey Rıbalka, Denis Qarmaş, Sergey Sidorçuk, Andrey Yarmolenko (hamısı "Dinamo”), Yevgeni Konoplyanka ("Sevilya”, İspaniya), Anatoli Timoşuk ("Kayrat”, Qazaxıstan), İvan Petryak, Aleksandr Karavayev (hər ikisi "Zarya”), Taras Stepanenko, Viktor Kovalenko, Maksim Malışev (hamısı "Şaxtyor”)

Hücumçular: Roman Zozulya ("Dnepr”), Artyom Kravets ("Ştutqart”, Almaniya), Filipp Budkovski ("Zarya”).

Ukrayna əvvəlki Avropa çempionatlarında:

1960 – SSRİ-nin tərkibində çıxış edib

1964 – SSRİ-nin tərkibində çıxış edib

1968 – SSRİ-nin tərkibində çıxış edib

1972 – SSRİ-nin tərkibində çıxış edib

1976 – SSRİ-nin tərkibində çıxış edib

1980 – SSRİ-nin tərkibində çıxış edib

1984 – SSRİ-nin tərkibində çıxış edib

1988 – SSRİ-nin tərkibində çıxış edib

1992 – MDB-nin tərkibində çıxış edib

1996 – final mərhələsinə yüksələ bilməyib

2000 – final mərhələsinə yüksələ bilməyib

2004 – final mərhələsinə yüksələ bilməyib

2008 – final mərhələsinə yüksələ bilməyib

2012 – qrup mərhələsi

AÇ iştirakçısı bizə qarşı: Yığmamızla oyunda tarix yazan komanda

Ukrayna milli komandası ilə rəsmi qarşılaşmada olmasa da, hazırlıq matçlarında üz-üzə gəlmişik. İlk dəfə 2006-cı ilin fevralında Bakıda qarşılaşan tərəflərin dualindən qol səsi çıxmasa da, bundan üç ay sonra Ukraynanın paytaxtındakı görüş meydan sahiblərinin 6:0-lıq qələbəsi ilə yekunlaşmışdı. Bu matçla bağlı maraqlı məqam isə bu nəticənin komanda tarixinin ən böyük hesablı qələbəsidir. Belə ki, onlar 6 il əvvəl Azərbaycan yığmasını 6:0 hesabı ilə yenməklə tarix yazıblar. 20 illik tarixinin sonrakı dövrünsə həmin nailiyyəti təkrarlamağı bacaran ukraynalılar daha böyük qələbə qazana bilməyiblər.

AVRO-2016-da oyunları:

12 iyun. 23:00. Almaniya – Ukrayna

16 iyun. 20:00. Ukrayna – Şimali İrlandiya

21 iyun. 20:00. Ukrayna – Polşa

Tural Məmmədov