İspaniya milli komandası Fransaya təkcə çempion kimi yox, həm də ardıcıl iki dəfə qitənin ən güclüsü olan ilk yığma kimi yollanır. "Buğalar” AVRO-2016-nın əsas favoriti sayılmasa da, oyun planında əksər iddialılardan üstün durumdadır. Düzdür, Xavili, İnyestalı futbolçu nəsli tükənməkdə olan pireneylilər əvvəlki qədər əzəmətli görünmür, ancaq bu amil onları əsas favoritlər sırasından silməyə əsas vermir.

Köhnə fəlsəfə ilə yeni tarix yazmaq mümkün olacaqmı?

Mütəxəssislərin fikrincə, "qırmızılar”a DÇ-2010-da və son iki Avropa çempionatında qitənin ən güclüsü adını qazandıran taktika köhnəlməyə başlayıb. Üstəlik, rəqiblər də buna qarşı oynamağın yollarını tapıblar. Boğucu total futbolu təsiri bağışlayan bu taktikanın son mundialda fiaskosu Del Boskeni də düşünməyə vadar edir. Son dünya çempionatında qrup səddini aşa bilməyən, mundialdan bir il öncə isə Konfederasiyalar kubokunda Braziliya tərəfindən darmadağın edilən pireneylilər yeni oyun üslubu tapmağa borcludur.

İspanlar necə oynayacaq?

Yuxarıda da qeyd etdiyimiz kimi, Del Boske yeni oyun üslubundan istifadə etmək fikiri ətrafında mütləq düşünməlidir. Əslində, təcrübəli çalışdırıcı indi daha fərqli oyun tərzinə üstünlük verir. Vaxtilə baş məşqçi postunda Avropa çempionu Luis Araqonesi əvəzləyən Del Boske düzgün addım ataraq taktikanı dəyişməz saxlamışdı. Pireney təmsilçisinin güvəndiyi 4-4-2 sxemi bu üslubun ispan modelini tərənnüm edirdi. Yəni yığma iki deyil, bir dayaq yarımmüdafiəçisi ilə mübarizə aparır, digər üç orta sahə oyunçusu isə hücuma meylli, yaradıcı işlə məşğul olurdu. Təcrübəli mütəxəssisin bu taktikası sayəsində matçın gedişində əvəzetməyə əl atmadan oyunu dəyişmək mümkün olurudu. Qapıda hələ də İker Kasilyası görmək mümkündür. Müdafiə xətti sabit olan İspaniya yığmasının sağ cinahında Xuanfran, solda isə Xordi Albaya yer alır. 4-3-3 sxeminə uyğun olan hər iki müdafiəçi hücumlara qoşulmağı yaxşı bacarır. Müdafiənin mərkəzi isə Xerard Pike və Serxio Ramos çıxış edir. Yarımmüdafiədəki "üçlüy”ü təxmin etmək isə çətindir. Sesk Fabreqasın hansı formada olacağı, David Silvadan necə yararlanılacağı orta sahə ilə bağlı suallar yaradır. Dünyanın ən yaxşı dayaq yarımmüdafiəçilərindən biri Serxio Buskets və onun solunda yer alan Andres İnyestanın da heyətdə olacağı şübhə doğurmur. Lakin sonuncunu İsko və Koke də əvəzləyə bilər. İspaniya yığmasını ən çox düşündürən isə ön xəttəki problemlərdir. Dieqo Kosta və Fernando Torresi milliyə dəvət etməyən Del Bosqe forvard qismində Arits Aduriz, Alvaro Morata, Saul, Nolito və Pedro Rodriges kimi ön xətt oyunçularına bel bağlayır.

Üç ulduz İspaniya yığmasından kənarda qaldı

İki gün öncə bütün komandalar kimi İspaniyanın da Avropa çempionatı üçün ilkin heyəti müəyyənləşdi. Maraqlıdır ki, Fernando Torres, Xuan Mata və Dieqo Kosta kimi ulduzların qitə birinciliyindən kənarda qalacağı əvvəlcədən məlum idisə, İsko və Saul Nigez də yekun heyətə düşə bilmədilər. Bu oyunçularla yanaşı, Çempionlar Liqasının final oyununda zədələnən "Real”ın müdafiəçisi Dani Karvaxal Fransaya gedəcək heyətdən kənarda qaldı.

Qapıçılar: İker Kasillas, David de Xea, Serxio Riko

Müdafiəçilər: Serxio Ramos, Jerard Pike, Xordi Alba, Mark Bartra, San Xose, Xuanfran, Hektor Bellerin, Sezar Azpilikueta

Yarımmüdafiəçilər: Sexio Buskets, Andreas İnyesta, Bruno Saltor, Pedro Rodrigez, Sesk Fabreqas, Koke, Tyaqo Alkantara, Nolito

Hücumçular: David Silva, Lukas Vazgez, Arits Aduriz, Alvaro Morata

İspaniya əvvəlki Avropa çempionatlarında:

1960 – imtina edib

1964 – Çempion

1968 – Final mərhələsinə yüksələ bilməyib

1972 – Final mərhələsinə yüksələ bilməyib

1976 – Final mərhələsinə yüksələ bilməyib

1980 – Qrup mərhələsi

1984 – II yer

1988 – Qrup mərhələsi

1992 – final mərhələsinə yüksələ bilməyib

1996 – 1/4 final

2000 – 1/4 final

2004 – Qrup mərhələsi

2008 – Çempion

2012 – Çempion

İspaniya yığması Avropa çempionu olsa...

Yeri gəlmişkən, İspaniya yığmasının futbolçularının Avropa çempionatında qazanacaqları mükafatın məbləği açıqlanıb Komanda əgər Avropa çempionu olarsa, 23 futbolçunun hər birinə 340 min avro ödəniləcək. Bu mükafat qələbə qazanılan oyunlar və çempionluq üçün UEFA-dan gələcək pulla qarşılanacaq. Komanda qrup səddini aşarsa futbolçulara 40, 1/4 finala adlasa 30, yarımfinala adını yazdırarsa 30, finala yüksələrsə 175 min avro veriləcək. Çempionluq isə oyunçulara 340 min avro qazanc gətirəcək. Lakin İspaniya millisi qrupda qalsa, heç bir oyunçuya əlavə pul verilməyəcək. Qeyd edək ki, İspaniya millisi 2010-cu ildə dünya çempionu olanda futbolçuların hər birinə 600 min avro mükafat verilmişdi.

AÇ iştirakçısı bizə qarşı: Bakıda 6 qol vuran "buğalar”

Dünyanın ən güclü komandalarından sayılan İspaniya yığma komandası rəsmi oyunlarda rəqibimiz olmayan azsaylı Avropa nəhənglərindəndir. Bu komanda ilə yalnız bir dəfə hazırlıq matçında üz-üzə gəlmişik ki, onda da səviyyə fərqi özünü aşkar şəkildə göstərib. Belə ki, 2009-cu ilin yayında Bakıda milli komandamızın qonağı olan ispanlar özlərini qonaq kimi aparmamış və Azərbaycan seçməsinin qapısına 6 cavabsız qol vurmuşdular.

AVRO-2016-da oyunları:

13 iyun. 17:00. İspaniya – Çexiya

17 iyun. 23:00. İspaniya – Türkiyə

21 iyun. 23:00. Xorvatiya – İspaniya

Tural Məmmədov