Qəribə işdir, Çexoslovakiyanın dağılmasından sonra müstəqil dövlət olan Çexiya yalnız bir dəfə dünya çempionatında oynasa da, Avropa birinciliklərinin daimi iştirakçılarındandır. Ümumiyyətlə, Çexiya millisi üçün Avropa çempionatları uğurlu alınır. Hələ Çexoslovakiya dönəmində qitə çempionu olan, müstəqillik dönəmində isə ardıcıl 6-cı dəfə qitənin ən böyük futbol forumunda yer alan "Narodnı tim” 1996-cı ildən başlayaraq bir dəfə də qitə çempionatının final mərhələsindən kənar qalmayıb. Özü də onlar ilk cəhddəcə finala qədər irəlləməklə adından xeyli söz etdirmişdi. Mərkəzi avropalıların AÇ-dəki digər uğuru isə 2004-cü ildə qazanılan bürünc mükafatdır.

Seçmə mərhələdə problem yaşanmadı

Bəlkə də heç kim Çexiya yığma komandasının AVRO-2016-ya qrup qalibi kimi vəsiqə qazanacağını gözləmirdi. Buna səbəb isə Pavel Vrbanın başçılıq etdiyi komandanın seçmə mərhələdə Hollandiyanın favoriti, Türkiyə yığmasının isə ikinci yerə iddialı olduğu qrupda yer alması idi. Lakin Hollandiya milli komandasının belə demək mümkünsə, faciəvi çıxışı, çexlərin "narıncılar”ı hər iki oyunda məğlub etməsi, eləcə də digər qarşılaşmalarda uğurlu nəticələr qazanması sonda "Narodnı tim”i qrup birincisi etdi. Hətta Latviya ilə oyundakı gözlənilməz xal itkisi və İslandiyaya məğlubiyyət də çexiyalıların qrup lideri olmasına mane olmadı.

"Köhnə qvardiya” əsas ümid yeridir

Çexiya milli komandası hazırda daha çox "köhnə qvardiya”ya bel bağlamaqdadır. Nedved, Poborski, Berger, Koller, Ujfaluşi kimi oyunçuların karyerasını bitirməsindən sonra əsas yük Petr Çex, Tomas Sivok, Roman Hubnik, Yaroslav Plaşil, David Lafata və Tomaş Rositski kimi "ağsaqqal”ların üzərinə düşür.

Çexiya əvvəlki Avropa çempionatlarında:

1960 – Çexoslovakiyanın tərkibində olub

1964 – Çexoslovakiyanın tərkibində olub

1968 – Çexoslovakiyanın tərkibində olub

1972 – Çexoslovakiyanın tərkibində olub

1976 – Çexoslovakiyanın tərkibində olub

1980 – Çexoslovakiyanın tərkibində olub

1984 – Çexoslovakiyanın tərkibində olub

1988 – Çexoslovakiyanın tərkibində olub

1992 – Çexoslovakiyanın tərkibində olub

1996 – II yer

2000 – Qrup mərhələsi

2004 – III yer

2008 – Qrup mərhələsi

2012 – 1/4 final

"Çelsi”nin üzvü yığmadan kənarda qaldı

Çexiya milli komandasının AÇ-yə hansı futbolçularla yollanacağına gəlincə, baş məşqçi Pavel Vrba ilkin heyətdən 7 oyunçunu çıxartmaqla yekun "23-lüy”ü müəyyən etdi. Komandanın heyətinə nəzər saldıqda "Çelsi”nin gənc müdafiəçisi Tomaş Kalasın milliyə çağırılmamasını maraq doğuran qərarlardan biri kimi qeyd etmək olar.

Qapıçılar: Peter Çex ("Arsenal”), Tomaş Vaslik ("Bazel”), Tomaş Kubek ("Slovan”)

Müdafiəçilər: Teodor Cebre Selasie ("Verder”), Roman Qubnik, David Limberski (hər ikisi "Viktoriya”), Pavel Kaderbaj ("Hoffenhaym”), Mixal Kadleç ("Fənərbaxça”), Tomaş Sivok ("Bursaspor”), Marek Suxi ("Bazel”)

Yarımmüdafiəçilər: Daniel Pudil ("Şeffild Uensdey”), Vladimir Darida ("Herta”), Borek Doçkal, Ladislav Qreyçki (hər ikisi "Sparta”), Daniel Kolarj ("Viktoriya”), David Pavelka ("Kasımpaşa”), Yaroslav Plaşil ("Bordo”), Tomaş Rositski ("Arsenal”)

Hücumçular: İrji Skalak ("Brayton”), Yozef Şural, David Lafata (hər ikisi "Sparta”), Tomaş Neçid ("Bursaspor”), Milan Şkoda ("Slaviya”)

AÇ iştirakçısı bizə qarşı: Beynəlxalq turnirdə yolunu kəsdiyimiz "Lokomativ”

Beynəlxalq arenada daha çox "Lokomativ” ləqəbi ilə tanınan Çexiya yığması ilə Azərbaycan milli komandası rəsmi oyunlarda olmasa da, beynəlxalq turnirdə qarşılaşıb. Belə ki, 2009-cu ilin noyabrında Əl-Ayn-da seçmə komandamıza rəqib olan Çexiya yığması 0:2 hesablı yenilgiyə üzülmüşdü.

Qrupdan çıxmağa iddia etmək olar

Final mərhələsində İspaniyanın favorit olduğu qrupda yer alan Çexiya təxminən bərabər səviyyəli üç komandanın mübarizəsində mərhələ adlamalıdır. Seçmə mərhələdə də bir qrupda oynadığı Türkiyə, həmçinin Xorvatiya ilə mübarizədə ən azı ötən Avropa çempionatındakı uğuru təkrar etmək və qrup mərhələsini adlamaq şansı heç də az deyil.

AVRO-2016-da oyunları:

13 iyun. 17:00. İspaniya - Çexiya

17 iyun. 20:00. Çexiya - Xorvatiya

21 iyun. 23:00. Çexiya – Türkiyə

Tural Məmmədov