Belçika milli komandası turnirin favoriti sayılmır, amma Avropa çempionatının sıradan komandası da deyil. Hər halda, komandanın seçmə mərhələnin gedişində FİFA reytinqinin 1-ci pilləsinə qədər yüksəlməsi çox şeydən xəbər verir.Heyətində xeyli samballı oyunçu olan "qırmızılar” kadr zənginliyi ilə öyünə biləcək azsaylı komandalardandır. Baş məşqçi Vilmotsun bütün zonalarda geniş oyunçu seçimi var. Hətta Azar, Fellaini, Vitsel, Dembele ve Lukaku kimi oyunçular da heyətdəki yerlərinin 100 faiz təmin olunduğuna əmin deyil.

Perspektivli, amma qeyri-sabit yığma

Tarixində Avropa çempionatının bir dəfə gümüş, bir dəfə isə bürünc medallarını qazanan "qırmızılar” son bir neçə ildə ən perspektivli yığmalardan biri sayılsa da, ciddi uğur qazana bilmir. Belçika yığması nə qədər perspektivlidisə, bir o qədər də qeyri-sabit çıxış edən komandadır. Hər halda, Belçika millisinin son üç qitə birinciliyindən kənar qalması vəziyyəti ortaya qoyur. Mütəxəssislərin fikrincə, sözügedən yığmanın əsas problemi təcrübənin çatışmamasıdır. Hər bir gənc komandada özünü göstərən bu çatışmazlıq böyük turnirlərdə uğurlar qazanmasına mane olur. Komandanın heyətində yalnız üçüncü qapıçı Jan-Fransois Jillenin, müdafiəçilərdən isə Nikolas Lomberts və Tomas Vermalenin yaşı 30-dan artıqdır ki, onlar da komandanın aparıcı simaları hesab olunmur.

Vilmotsu qayğılandıran məqamlar

Komandanın kapitanı və məkəz müdafiəçisi Vensan Kompani zədəli olduğu üçün AVRO-2016-da forma geyməyəcək ki, bu da məşqçilər korpusunu düşündürməyə bilməz. Bundan başqa, Cordan Lukaku və Tomas Menye cinah müdafiəçiləri olsa da, öz mövqelərində o qədər də inamlı təsir bağışlamır. Şübhəsiz bu amil də Mark Vilmots narahat edir. Seçmə mərhələdə ön xəttdə stabil olaraq şans əldə edən Divok Oriqinin Avropa çempionatının startına qədər hansı vıziyyətdə sıraya dönəcəyi də bilinmir. İngiltərə "Liverpul”nun heyətində zədələnərək mövsümü qapayan 21 yaşlı hücumçunun ideal formada olmaması Belçika üçün ciddi itki ola bilər.

Belçika əvvəlki Avropa çempionatlarında:

1960 – İştirak etməyib

1964 – Final mərhələsinə yüksələ bilməyib

1968 – Final mərhələsinə yüksələ bilməyib

1972 – III yer

1976 – Final mərhələsinə yüksələ bilməyib

1980 – II yer

1984 – Qrup mərhələsi

1988 – Final mərhələsinə yüksələ bilməyib

1992 – Final mərhələsinə yüksələ bilməyib

1996 – Final mərhələsinə yüksələ bilməyib

2000 – Qrup mərhələsi

2004 – Final mərhələsinə yüksələ bilməyib

2008 – Final mərhələsinə yüksələ bilməyib

2012 – Final mərhələsinə yüksələ bilməyib

Son anda milliyə iki müdafiəçi cəlb olundu

May ayının son günündə Belçika milli komandasının Avropa çempionatı üçün yekun heyəti bəlli oldu. Komandanın ilkin siyahısında 24 oyunuya yer verən baş məşqçi Mark Vilmotsun yekun "23”lüyü müəyyən edərkən heyətdə bəzi dəyişikliklər etməsi diqqətdən yayınmadı. Belə ki, ilkin siyahıya 24 oyunçunun adını yazan 47 yaşlı mütəxəssis sonradan onlardan 3-nü - Dedrik Boyata, Byorn Engels və Nikolas Lombertsi qitə birinciliyinə aparmamaq qərarına gəldi. Əvəzində isə müdafiəçilər Loren Kiman və Kristian Kabasele milliyə cəlb olundular.

Qapıçılar: Tibo Kurtua ("Çelsi”, İngiltərə), Jan-Fransois Jille ("Mexelen”), Simon Minyole ("Liverpul”, İngiltərə)

Müdafiəçilər: Tobi Alderveyreld, Yan Vertongen (hər ikisi "Tottenhem”, İngiltərə), Tomas Vermalen ("Barselona”, İspaniya), Ceyson Denayer ("Qalatasaray”, Türkiyə), Cordan Lukaku ("Ostende”), Loren Kiman ("Monreal İmpakt”, ABŞ), Tomas Meunyer ("Brügge”), Kristian Kabasele ("Genk”)

Yarımmüdafiəçilər: Aksel Vitsel ("Zenit”, Rusiya), Maruan Fellaini ("Mançester Yunayted”, İngiltərə), Mussa Dembele ("Tottenhem”, İngiltərə), Radxa Nainqqolan ("Roma”, İtaliya), Kevin de Bruyne ("Mançester Siti”, İngiltərə)

Hücumçular: Romelu Lukaku ("Everton”, İngiltərə), Eden Azar ("Çelsi”, İngiltərə), Dris Mertens ("Napoli”, İtaliya), Kristian Benteke, Divok Oriqi (hər ikisi "Liverpul”, İngiltərə), Miki Batşuayi ("Marsel”, Fransa), Yannik Karrasko ("Atletiko”, İspaniya).

AÇ iştirakçısı bizə qarşı: İki AÇ-nin seçmə mərhələsində qrupumuzda qalanlar

Belçika milli komandası indiyə qədər dörd dəfə Azərbaycan yığmasına rəqib olub. Bütün hallarda Avropa çempionatının seçmə mərhələsində qarşılaşdığımız "qırmızılar” bizimkilərə qarşı yalnız sonuncu matçda büdrəmişdi. AVRO-2012-nin seçmə mərhələsi çərçivəsində 2011-ci ilin sentyabrında Bakıda heç-heçə (1:1) oynayan tərəflərin digər üç matçında Belçika üç xal qazanıb. AVRO-2012-nin seçmə mərhələsindəki ilk görüşdə 4:1 hesabı ilə qələbə qazanan rəqib buna qədər isə AVRO-2008-in seçmə oyunlarında 3:0 və 1:0 hesabları ilə qalib gəlmişdi. 2006-cı ilin oktyabr ayında Brüssüldə qapımıza üç dəfə yol tapan rəqib bundan bir il bir ay sonra isə Bakıda minimal hesablı qələbəyə sevinmişdi. Ancaq hər iki halda Belçika qrupda ilk iki pillədən birini tutmaqla AÇ-yə vəsiqə əldə edə bilməmişdi.

AVRO-2016-da oyunları:

13 iyun. 23:00. Belçika – İtaliya

18 iyun. 17:00. Belçika - İrlandiya

22 iyun. 23:00. İsveç – Belçika

Tural Məmmədov