Yəqin ki, İslandiya milli komandasının Avropa çempionatının iştirakçıları arasında olacağını heç kim gözləmirdi. Axı söhbət 60-70-ci illərdə ümumiyyətlə, AÇ və DÇ-nin seçmə mərhələsinə qatılmayan, 80-90-cı illərdə isə "qapazaltı” olan yığmadan gedir. Düzdür, İslandiya futbolunda son illərdə olan inkişafı inkar etmək olmaz. Xüsusən ölkədə "Futbolun İnkişafına dair Dövlət Proqramı” işə düşəndən sonra ölkə futbolunda irəlləyiş hiss olundu. Ancaq bununla belə, Avropa çempionatının iştirakçılarının sayı 24-ə çatdırılmasaydı, çətin ki, "Qeyzerlər ölkəsi” Fransaya yollanan komandalar arasında olardı.

Amma iştirakçı sayının artırılmasını qabartmaqla "Bizim oğlanlar”ın uğuruna kölgə salmaq olmaz, çünki İslandiya final mərhələsinə qrup ikincisi kimi birbaşa vəsiqə qazanıb. Bu uğurda Hollandiya və Türkiyənin inanılmaz enişinin də təsiri az olmadı. Türkləri evdə, Hollandiya yığmasını isə hər iki oyunda məğlub edən İslandiya artıq seçmə mərhələdə boyundan yuxarı tullanmışdı. AVRO-2016-ya yollanmaq Lars Laqerbekin komandası üçün tarix yazmaq anlamına gəlir. Qrupdan çıxmaq isə İslandiya üçün mümkünsüzü bacarmaq kimi bir şey hesab olunur. Amma onlar özləri bunu heç də "dəryada balıq sevdası” saymır, çünki Portuqaliya nə qədər çətin rəqibdirsə, Macarıstan və Avstriya o qədər münasib komandalardır.

Bir postun iki sahibi

İslandiya milli komandası bir neçə cəhətinə görə digər AÇ iştirakçılarından seçilir. Bunlardan biri debütantın AVRO-2016-ya iki baş məşqçi ilə yollanmasıdır. Belə ki, sözügedən yığmaya Lars Laqerbek və Heymir Halqrimsson cütlüyü başçılıq edir. Qeyd edək ki, əvvəllər Laqerbekin köməkçisi kimi çalışan yerli mütəxəssis sonradan isveçli baş məşqçinin postuna şərik olmuşdu. Maraqlıdır ki, Laqerbek əvvəllər öz ölkəsinin yığmasını da şərikli çalışdırmışdı. İslandiya milli komandası ilə bağlı daha bir maraqlı məqam isə komandanın heyətində yerli çempionatda çıxış edən futbolçunun olmamasıdır.

Hücumu qənaətbəxş, müdafiəsi zəif "bizim oğlanlar”

Komandanın hücum xətti kollektivin ən güclü zonası hesab olunur. Ötən mövsüm İngiltərənin "Suonsi Siti" klubunda top qovan Gilfi Siqurdsson, Almaniyanın "Ausburq” komandasının üzvü Alfred Finnboqason, eləcə də Fransa "Nant”ından Kolbeyn Siqtorsson komandanın aparıcı simaları hesab olunur. İslandiya futbolunun əfsanəsi hesab edilən Eydur Qudyonsen də yığmanın düşərgəsindədir. Bundan başqa, yarımmüdafiəçilər Birkir Byarnason və Aron Qunnarsson da millinin aparıcı üzvləri arasındadır. "Qeyzerlər ölkəsi”nin zəif cəhəti kimi isə müdafiə xəttinin istənilən səviyyədə olmaması, eləcə də qapıçının etimadı doğrulmamasıdır. İslandiyalıların "1 nömrə”si Hannes Halldorsson orta səviyyəli qapıçı olsa da, şimallıların başqa seçim imkanı da yoxdur.

"Qeyzerlər ölkəsi”nin 23 cəngavəri

Komandanın AVRO-2016-ya hansı heyətlə yollanacağına gəlincə, millinin məşqçilər korpusu hələ ötən ayın əvvəlində Avropa çempionatına yollanacaq "23-lüy”ü müəyyən etmişdi. Düzdür, ilkin heyətdə altı ehtiyat oyunçunun da adı açıqlanmışdı, ancaq hər hansı planlaşdırılmayan problemin yaşanmayacağı halda onların AÇ-dən kənar qalacağı əvvəldən məlum idi ki, sonda da məhz gözlənilən kimi oldu.

Qapıçılar:Hannes Haldersson ("Bude-Qlimt"), Oqmundur Kristinsson ("Hammarbyu"), İnqvar Yonsson ("Sandeford")

Müdafiəçilər:Birkir Sevarson ("Hammarbi"), Raqnar Siqurdsson ("Krasnodar"), Kari Arnason ("Malmö"), Ari Skulason ("Odense"), Haukur Hauksson (AİK), Sverrir İnqason ("Lokeren"), Herdyur Maqnusson ("Çezena"), Hertyur Hermannsson ("Qöteburq")

Yarımmüdafiəçilər:Aron Qunnarsson ("Kardif"), Emil Hallfredsson ("Udineze"), Birkir Byarnason ("Bazel"), Yohan Berq Qudmundsson ("Çarlton"), , Elmar Byarnason ("Orxus"), Runar Siquryonsson ("Sundsvall"), Adnor Traustason ("Norçepinq")

Hücumçular:Eydur Qudyonsen ("Molde”), Kolbeyn Siqtorsson ("Nant”), Alfred Finnboqason ("Ausburq”), Yon Bedvarsson ("Kayzerslautern”), Gilfi Siqurdsson ("Suonsi Siti")

AÇ iştirakçısı bizə qarşı: Reykyavikdə "sülh” bağladığımız yığma

İslandiya milli komandası Azərbaycan yığması ilə yalnız bir dəfə qarşılaşıb ki, bu da hazırlıq matçı çərçivəsində baş tutub. 2008-ci ilin avqustunda Reykyavikdəki matç 1:1 hesabı ilə başa çatıb. Məlumat üçün deyək ki, həmin qarşılaşmada milli komandamızın heyətində Fabio Luis Ramim fərqlənmişdi.

AVRO-2016-da oyunları:

14 iyun. 23:00. Portuqaliya - İslandiya

18 iyun. 20:00. İslandiya - Macarıstan

22 iyun. 20:00. İslandiya – Avstriya

Tural Məmmədov