Sumqayıt Olimpiya İdman Kompleksində üzgüçülük üzrə 2001-2002; 2003-2004; 2005-2006-cı il təvəllüdlü oğlan və qızlar arasında açıq şəhər birinciliyi keçirilib. Yarışda 80 nəfərdən artıq idmançı qalib adı uğrunda mübarizə aparıb.
Birinciliyin açılış mərasimində çıxış edən Sumqayıt Olimpiya İdman Kompleksinin direktoru, Əməkdar Bədən Tərbiyəsi və İdman Xadimi, Azərbaycan Respublikası Prezidentinin fərdi təqaüdçüsüMəmməd Eyvazov, Sumqayıt şəhər Gənclər və İdman Baş İdarəsinin aparıcı məsləhətçisi Pərviz Cəmilov Ölkə Başçısı, Milli Olimpiya Komitəsinin Prezidenti cənab İlham Əliyevin yorulmaz fəaliyyəti və fədakarlığı sayəsində Azərbaycan idmançılarının Braziliya Yay Olimpiya Oyunlarında əldə etdiyi möhtəşəm qələbə münasibəti ilə tədbir iştirakçılarını təbrik etdilər. Natiqlər çıxışını davam edərək digər sahələr kimi bədən tərbiyəsi və idman sahəsinə göstərilən dövlət qayğısı, yaradılan şərait, respublikamızda keçirilən Beynəlxalq əhəmiyyətli tədbirlər, Gənclər və İdman Nazirliyi və müvafiq Federasiyaların birgə fəaliyyəti ilə əldə olunan nailiyyətlər, bu sahənin şəhər İcra hakimiyyəti rəhbərliyinin də daim diqqət mərkəzində saxlamasından, Sumqayıt idmançılarının qazandığı uğurlar barədə geniş məlumat verdilər.
Gərgin idman mübarizəsi şəraitində davam edən yarışda Rəhimə Əhmədova, Ramilə Ələkbərova qızlar arasında, Fərhad Novruzov, Kamil Sarıyev və Cəmil İmanov bütün rəqiblərinə qalib gələrək fəxri kürsünün ən yüksək pilləsinə qalxıblar.
Yarışın qalib və mükafatçıları Gənclər və İdman Baş İdarəsinin fəxri fərman, medal və hədiyyələri ilə təltif olunub.

Xəbərdən istifadə edərkən istinad etmək vacibdir.