Voleybol Azərbaycanda populyar idman növüdür. Bir neçə il öncə ölkəmizdə voleybolun yüksək inkişafından hər kəs xəbərdar idi. Lakin sonradan bu kollektiv idman növü zəiflədi, güclü legioner voleybolçular isə ölkəmizi tərk etdilər. Sumqayıt da daim öz idmançıları, xüsusən voleybolçuları ilə seçilib. Ölkə voleyboluna Vüsal Rüstəmov, Elməddin Məmmədli, Cavid Əzimov, Vüqar Həsənov, İlkin Əliyev və Miryaqub Qaraxanov kimi idmançılar verən Sumqayıt yığması indi çətinliklərlə üzləşib. 2008-ci ildən "Gənclər şəhəri” komandasına rəhbərlik edən respublika dərəcəli hakim Dilqəm Qəhrəmanov çətinliklərdən gileylənir. Belə problemlər və dəstək olmadığından perspektivli voleybolçular idmanı tərk edirlər. Hər bir iş üçün ən önəmli olan onun bünövrəsidir. İdmanın bünövrəsi də orta məktəblərdə qoyulmalıdır. Sumqayıtda 10-12 yaş və 12-16 yaş qrupları üzrə 4 komanda fəaliyyət göstərir. Bu komandalarda ümumilikdə 60-a yaxın idmançı var. "Neftçi” klubunun oyunçusu, gənclərdən ibarət yığma komandanın kapitanı Elməddin Məmmədli də Sumqayıt məktəbinin yetirməsidir. Əslində "Gənclər şəhəri”ndə voleybolun təbliğinə ehtiyac yoxdur. Burada oğlan və qızlara voleybolu sevdirməyin və öyrətməyin yeganə yolu şəhərdə klub yaratmaqdır. Sumqayıtda peşəkar klublar formalaşsa, o zaman itkilərin qarşısı alınacaq. İnkişaf və uğurlu çıxış fonunda isə perspektivli voleybolçular milli komandaya dəvət alacaqlar. Artıq 5 ildir Sumqayıt yığmasında top atıb-tutan Nigar Əmiraslanova da problemləri unudacaq. Sumqayıt yığması ölkə üzrə keçirilən çempionatlarda adını birincilər sırasına yazdırmağı bacarıb. Şəhərin oğlanlardan ibarət komandası 2, voleybolçu qızlar isə 1 dəfə çempion olublar. Kişi voleybolçulardan ibarət komanda həmçinin, "Tbilisi Open 2016” beynəlxalq turnirində 2-ci yer tutub.
RAMİL ZEYNALLI
Xəbərdən istifadə edərkən istinad etmək vacibdir.
