Sumqayıt şəhər olimpiya kompleksində Azərbaycan Respublikasının əməkdar bədən tərbiyəsi və idman xadimi Vaqif Əliyevin xatirəsinə həsr edilmiş yunan – roma güləşi üzrə iknci ənənəvi respublika turniri keçirilib. Öncə Azərbaycan Respublikasının dövlət himni səsləndirilib. Tədbiri giriş sözü ilə açan Sumqayıt gənclər və idman baş idarəsinin rəis əvəzi Mübariz Bəşirov ölkədə idmana olan diqqət və qayğıdan, beynəlxalq yarışlarda əldə olunan uğurlardan  söz açıb. Bu yarışda iştirak edən idmançılara uğurlar arzulayıb. Daha sonra çıxış edən əməkdar bədən tərbiyəsi və idman xadimi Vaqif Əliyevin oğlu Məmməd Əliyev ilk olaraq qonaqları salamlamış, idmana göstərilən diqqət və qayğıya görə ölkə Prezidenti cənab İlham Əliyevə, tədbirin keçirilməsində yaratdığı şəraitə görə Sumqayıt şəhər İcra Hakimiyyətinin başçısı Zakir Fərəcova öz dərin minnətdarlığını bildirib. O, atasının xatirəsini əziz tutaraq tədbrdə fəal iştirak edən Vaqif Əliyevin tələbələri Qərib Əliyev, Tahir Əliyev, üç qat dünya çempionu Məhyəddin Allahverdiyevə təşəkkür edib. Daha sonra yarışa start verilib. Qeyd edək ki, Bakı və Sumqayıt daxil olmaqla 16 şəhər və rayondan 300 - ə yaxın kiçik yaş qrupunda yeniyetmələr qləbə uğrunda mübarizə aparıb.