Benzemanın komandası vaxtından əvvəl pley-offa vəsiqəni özlərinə təmin etdilər.

Salvadorun “Arena Fonte Nova” stadionunda Fransa yığması İsveçrə ilə qarşılaşdı.

Oxu.Az xəbər verir ki, oyunun taleyi elə ilk hissədə həll olundu.

17-ci dəqiqədə künc zərbəsindən sonra Olivye Jiru başla topu isveçrəlilərin qapısına göndərdi, 1:0.

Buraxılmış qoldan özlərinə gəlməmiş isveçrəlilər ikinci topu buraxdılar. Bexraminin kobud səhvindən sonra Karim Benzema Blezu Matüdini zərbə mövqeyinə çıxardı, sonuncu isə qapının yaxın küncünü dəqiq nişan aldı, 2:0.

32-ci dəqiqədə hakim İsveçrənin qapısına müəmmalı penalti təyin etdi. Lakin Benzemanın zərbəsini qapıçı dəf etdi, qayıdan topu isə Valbuena boş qapıdan keçirə bilmədi. Belə bir vəziyyətdə qol vurmaq, vurmamaqdan asan idi.

Buna baxmayaraq, fransızlar ilk hissədə üçüncü topu vurmağa müvəffəq oldular. Onlar 40-cı dəqiqədə rəqiblərini əks hücumda yaxalayaraq fərqi üç topa çatdırdılar. Valbuena Jirunun ötürməsindən sonra isə fərqləndi.

Dördüncü qol 67-ci dəqiqədə gəldi. Pol Poqbanın ideal ötürməsindən sonra Karim Benzema topu qapıçının ayaqları arasından keçirdi. 6 dəqiqə sonra isə isveçrəlilər qapılarında beşinci topu gördülər. Benzemanın ötürməsindən sonra Sissoko fərqləndi.

İsveçrəlilər bu qollardan yalnız ikisinin əvəzini çıxa bildilər. 81-ci dəqiqədə Djemaili cərimə zərbəsindən gözəl qol vurdu, 87-də isə Xhaka komandasını rüsvayçı məğlubiyyətdən xilas etdi.

Oyunun sonunda isə Benzema baxımlı qol vursa da, hakim qolu qeydə almadı - final fiti artıq səslənmişdi.

Fransa yığması inamlı qələbə qazanır və pley-off mərhələsinə vəsiqəni təmin etdi.

İsveçrəlilərin isə əzmkar oyununu qeyd edib, onlara Hondurasa qarşı son turda uğurlar arzulamaq qalır.