Sumqayıt Olimpiya İdman Kompleksində Azərbaycanın Milli Qəhrəmanı  Kərəm Mirzəyevin xatirəsinə həsr olunmuş yeniyetmələr və gənclər arasında Karate-do Şotokan üzrə regional turnir təşkil olunub.
Qubadlı rayon İcra Hakimiyyətinin təşəbbüsü,  Rayon Gənclər və İdman idarəsi və Azərbaycan Respublikasının Milli Karate Federasiyasının birgə təşkilatçılığı ilə keçirilən turnirdə  çıxış edənlər  Kərəm Mirzəyevin həyat yoluna nəzər salaraq qeyd ediblər ki, Vətən torpağını düşməndən müdafiə etmək onun əsas məqsədi və amalı olub.
 Qeyd olunub ki, rəşadətlə vuruşan  Kərəm Mirzəyev 1992-ci il oktyabrında Laçın rayonunun Mazutlu kəndinə hücumu zamanı mühasirəyə düşmüş döyüşçü yoldaşlarını xilas edərkən qəhrəmancasına həlak olub.
Azərbaycan Respublikası prezidentinin 11 may 1993-cü il tarixli 599 saylı fərmanı ilə ölümündən sonra ona  "Azərbaycanın Milli Qəhrəmanı” adı verilib.
Çıxış edən Milli Qəhrəmanın atası Ərşad Mirzəyev qeyd edib ki, şəhidlərin adlarının bu səpkili tədbirlərlə əbədiləşməsi yeni formalaşan gəncliyin vətənpərvər olmasına, dövlətini sevən vətəndaş kimi yetişməsinə səbəb olacaq.
Qeyd edək ki, turnirdə 10 komanda olmaqla  idmançı öz qüvvələrini sınayıblar.
Yarışda 1, 2, 3- cü yerləri tutmuş idmançılar Qubadlı rayon Gənclər və İdman idarəsinin və Azərbaycan Respublikası Milli Karate Federasiyası diplomları ilə təltif edilib.
Hicranə İsmayılova
Xeberle.com

Xəbərdən istifadə edərkən istinad etmək vacibdir.