Futbol üzrə Azərbaycan kuboku yarışlarının final oyunu keçirilib. SİA-nın məlumatına görə, Tofiq Bəhramov adına Respublika stadionunda “Qəbələ” və “Neftçi” komandaları qarşılaşıblar.

FİFA referisi Əliyar Ağayevin idarə etdiyi oyunda nominal ev sahibi olan “Qəbələ”nin heyətində meydana Kamran Ağayev, Rail Məlikov, Marat İzmayılov, Nizami Hacıyev, Viktor Mendi, Luis Hilario Dodo, Lorenzo Ebesilio, Ruslan Tağızadə, İbrahima Niasse, Rafael Santos və Davrovjan Erqaşov çıxıblar.

“Neftçi”nin ilk “11-liyi”ndə isə Saşa Stamenkoviç, Karlos Kardoso, Rəşad Sadiqov, Flavinyo, Cavid İmamverdiyev, Erik Fabian Ramos, Bruno Bertuççi, Samir Məsimov, Məqsəd İsayev, Elvin Yuniszadə və Örnest Nfor yer alıblar. Qarşılıqlı hücumlar şəraitində keçən oyunun ilk hissəsində hesab açılmayıb.

Matçın 53-cü dəqiqəsində “Neftçi”nin futbolçusu Samir Məsimov hesabı açıb. 21 dəqiqə sonra “Qəbələ”nin oyunçusu Marat İzmayılov hesabı bərabərləşdirib.

Oyunun əsas vaxtı 1:1 hesablı heç-heçə ilə başa çatdığı üçün görüşə daha 30 dəqiqə əlavə olunub. Əlavə vaxtda da hesab dəyişmədiyi üçün qalib penalti seriyasında müəyyənləşib.

11 metrlik zərbələri dəqiq yerinə yetirən “Neftçi” komandası (3:2) Azərbaycan kuboku yarışlarının qalibi olub. Görüşün hakimlərinə xüsusi hədiyyələr, “Qəbələ”nin futbolçularına isə gümüş medallar təqdim olunub. Kuboku isə qalib komandaya Peşəkar Futbol Liqasının prezidenti Ramin Musayev təqdim edib.

Sonda azarkeşlər və media nümayəndələri arasında lotereya oynanılıb.

Qeyd edək ki, bu qələbə ilə “Neftçi” komandası Avropa Liqası yarışlarına ikinci təsnifat mərhələsindən başlayacaq.