Ötən mövsümü 9-cu pillədə tamamlamaqla Topaz Premyer Liqasında qalan “Sumqayıt” yeni mövsümün hazırlıqlarına dünəndən başlasa da, indi komandanın hazırlıq planından bəhs edən yoxdur. Bunun səbəbi isə komandanın həm maliyyə problemi yaşaması, həm də klubda xeyli dəyişikliklərin olmasıdır. Təbii ki, belə vəziyyətdə şəhərimizin komandasındakı son durumu dəyərləndirmək maraqlı olardı.

Maliyyə problemi var, ya yoxdur?

Uzun müddətdir ki, “kimyaçılar”ın maddi vəziyyətinin yaxşı olmaması barədə məlumatlar dolaşır. Son olaraq isə futbolçuların son iki ayın maaşını və əvvəlki aylardan qalan mükafatları ala bilməməsi barədə informasiyaların mətbuata sızması durumun ürəkaçan olmamasını ortaya qoydu. Amma “gənclik şəhəri”nin təmsilçisinin yeni mövsüm ərəfəsində xeyli sayda transferlər etməsi maliyyə problemi yaşayan komandaya yaraşmayan görüntüdür. Üstəlik, komandanın Türkiyədə hazırlıq keçməyi planlaşdırması da maddi vəziyyətin qənaətbəxş olmasını düşünməyə əsas verir. Ən əsası da bir müddət əvvəl Türkiyənin “Karşıyaka” komandası ilə anlaşan şəhərimizin futbol məktəbinin yetirməsi Mahir Şükürovun qardaş ölkəyə yollanmamışdan əvvəl “Sumqayıt”la razılıq əldə etməsi idi. Tərəflərin şifahi razılığına əsasən millimizin üzvü Izmir təmsilçisi ilə razılığa gələ bilməsəydi, yeni mövsümdə “kimyaçılar”ın şərəfini qoruyacaqdı. Əgər komanda rəhbərliyi milli komandamızın üzvünün “Sumqayıt”a keçidində maraqlı idisə, deməli, müdafiəçinin məvacibini ödəmək qorxusundan da azad idi. Bu isə bizi sözügedən klubda maliyyə problemi olub-olmaması məsələsi ətrafında baş sındırmağa sövq edir.

Qocalardan ibarət gənc komanda?!

“Sumqayıt”a ikinci “Şəfa”da deyənlər var. Axı artıq tarixin yaddaşına köçmüş paytaxt klubu kimi “gənclik şəhəri”nin komandasının da yaradılmasında əsas məqsəd milli komandalarımız üçün futbolçu yetişdirmək idi. Amma deyəsən, yeni mövsümdə “Sumqayıt" AFFA-nın "bu şəhərdə komanda var" adlı layihəsinin boyat versiyasından başqa bir şey deyil” düşüncəsində olan azarkeşlərin fikirini dəyişmək üçün bu missiyasından əl çəkmək niyyətindədir. Belə olmasa, Ruslan Poladov, Aqil Nəbiyev, Ramazan Abbasov və s. kimi gəncliyini çoxdan geridə qoymuş futbolçular komandaya cəlb olunmazdı. Amma bu oyunçularla iddialı kollektiv formalaşdırmaq istəyi dəryada balıq sevdasından başqa bir şey deyil. İndiki halda,“Sumqayıt” qocalar evini xatırladır. Karyerasını başa vurmaq üzrə olanlar, klubsuz qalanlar sonuncu ümid yeri kimi “kimyaçılar”a üz tutur.

Şübhəli məqamlar “Sumqayıt”a yaraşmır

Yəqin ki, ölkə futbolunda şəffaflığın olduğuna inanan azarkeşlərin sayı o qədər də çox deyil. Təsadüfi deyil ki, ölkədaxili yarışlarda nə hakimlərin hansısa komandaya rəğbəti haqda söz-söhbətlər səngiyir, nə də AFFA-nın və ya PFL-in bilərəkdən hər hansı kluba yardımçı olması barədə söyləntilər sona çatır. Elə “Sumqayıt”ın dolayısıyla AFFA-nın baş katibi Elxan Məmmədovun nəzarətində olması yönündə məlumatların dolaşması da yeni bir şey deyil. Bununla yanaşı, ötən mövsüm “Sumqayıt”ın “Neftçi” və “Qarabağ” üzərində qazandığı qələbələrin şübhə altında olması Aqil Məmmədovun “drujinası” üçün xoş olmayan mənzərədir Məhz bu cür söyləntilərin nəticəsidir ki, növbəti mövsümdə hansısa klubun kuboka görə, digər bir komandanın isə çempionluğu təmin etdiyinə üçün Premyer Liqa matçını "Sumqayıt"a qurban verəcəyinə demək olar ki, şübhə edən yoxdur.

Sponsorlar komandadan imtina edir?

Son günlər “Sumqayıt”ın adı ətrafında yayılan daha bir xəbər isə komandanın sponsorlarının bəzilərinin kollektivi himayə etməkdən imtina etmək niyyətində olması idi. Qeyri-rəsmi mənbənin verdiyi məlumatda komandanı maliyyələşdirməkdən imtina etməyi planlaşdıran sponsorun adı açıqlanmasa da, komandanın tərəfdaşının yeni mövsümə qədər “kimyaçılar”la əməkdaşlığa son qoymaqda maraqlı olduğu bildirilir. Xatırladaq ki, komandanın baş sponsoru  “Azərikimya” İstehsalat Birliyi, digər rəsmi tərəfdaşları isə “Paşa Həyat”, “Aquavita”, AZENCO, “AccsessBank”, “Spektr.Travel” və “Kapital Bank”dır.

Sumqayıt stadionunun adı dəyişdirildi

"Sumqayıt"ın ev oyunlarını keçirdiyi Sumqayıt İdman Mərkəzinin stadionunun adı dəyişdirildi. Bu arena növbəti mövsümdən etibarən "Kapital Arena" adlanacaq. Xatırladaq ki, arena yeni reklam tərəfdaşları olan Kapital Bankla imzalanmış müqaviləyə əsasən 1 il "Kapital Arena" adlanacaq.

Tural Məmmədov Xeberle.com