Növbəti mərhələdə avropalıların rəqibi Argentina yığması olacaq.

1/8 finalın son görüşündə Belçika millisi ABŞ yığmasını 2:1 hesabla məğlub etdi.

Oxu.Az xəbər verir ki, əsas 90 dəqiqə ərzində qapılara qol vurulmadı, baxmayaraq ki, belçikalıların həm birinci, həm də ikinci hissədə, hesabı açmaq üçün çox gözəl imkanları var idi. Amerikalıların qapıçısı Tim Hovard inamlı oynayırdı. 

Oyun taleyini isə meydançaya əlavə edilmiş vaxtın birinci yarısında daxil olmuş Romulu Lukaku həll etdi. Əvvəlcə o fərdi ustalığı sayəsində amerikalı müdafiəçini gəridə qoyaraq cərimə meydançasına daxil oldu və Kevin De Breyneyə məhsuldar ötürmə etdi. 

105-ci dəqiqədə isə elə həmin Kevin De Breynedən məhsuldar ötürmə alan Lukaku hesab arasındakı fərqi iki topa çatdırdı.

Amerikalılar sanki bu qollardan sonra oyandılar. 107-ci dəqiqədə meydançaya sonradan daxil olmuş Qrin bu toplardan birinin əvəzini çıxdı. ABŞ futbolçuları bu qoldan sonra bütün komanda ilə hücuma atıldılar. Lakin onlar nə qədər çalışsalar da, hesabı bərabərləşdirə bilmədilər. 

Rəqibindən daha üstün oyun nümayiş etdirən Belçika yığması layiqli qələbə qazandı.

1/4 finalda avropalıların rəqibi Argentina yığması olacaq.