Rusiyanın "Qazprom” şirkətinin rəhbəri Aleksey Miller bu gün Ankarada Türkiyənin enerji naziri Taner Yıldızla ambisiyalı "Türk axını” qaz kəməri layihəsinə dair növbəti danışıqlar aparıb.
Danışıqlardan sonra Aleksey Miller bildirib ki, "Türk axını” kəmərinin istismara verilməsi 2016-cı ilin dekabrına planlaşdırılır. Məlumatı "Qazprom”un mətbuat xidməti yayıb.
"Türkiyə ilə Rusiya arasında "Türk axını” kəmərinin 2016-cı ilin dekabrında istismara verilməsinə və kəmərlə qaz nəqlinin başlamasına dair razılaşma əldə olunub”- deyə A.Miller Taner Yıldızla danışıqlardan sonra bildirib.
"Qazprom” rəhbəri dyib ki, Rusiya holdinqi layihəyə dair iş qrafikini bu razılaşmaya uyğun müəyyən edəcək.
Bu isə o deməkdir ki, "Qazprom” Azərbaycan qazının Türkiyə üzərindən Avropaya nəqlini azı 3 il qabaqlamağa hazırlaşır. "Türk axını” layihəsinə əsasən "Qazprom” Qara dənizin dibindən Türkiyəyə kəmər çəkəcək. Bu kəmər Türkiyənin Yunanıstanla sərhədinə qədər uzanacaq, oradan isə təxmin olunan marşruta görə Albaniya, Monteneqro, Bosniya-Herseqovina və Sloveniyadan keçməklə mərkəzi Avropaya istiqamət alacaq.
Azərbaycan qazı isə tikilməkdə olan TANAP kəməri ilə Türkiyə-Yunanıstan sərhədinə nəql ediləcək. Oradan tikintisi hələ başlamayan TAP kəməri ilə Yunanıstana, İtaliyayaya və Albaniyaya istiqamət alacaq.
Bu günlərdə "Şahdəniz-2” konsorsiumunun operatoru olan BP Cənub Qaz Dəhlizi ilə (TANAP+TAP) qaz nəqlinin 2020-ci ildən başlayacağı, yəni qaz nəqlinin daha bir il gecikəcəyi barədə tərəfdaşlarını məlumatlandırıb.
Bu isə o deməkdir ki, ləngimə Rusiya üçün əla fürsət olub. "Qazprom” Türkiyə tərəfi ilə danışıqlar apararaq "Türk axını” kəmərinin 2016-cı ilin sonundan gec olmayaraq işə düşməsinə dair razılıq əldə edib.
Əlbəttə, bu tarixin nə qədər real olduğunu demək hələ çətindir. Çünki "Türk axını” kəməri layihəsinin texniki-iqtisadi əsaslandırılması hələ başa çatmayıb. Kəmərin tikintisinin bu qədər qısa müddətdə başa gələcəyi ağlabatan görünmür. Hərçənd ki, "Qazprom” göstərilən müddətdə tikintini başa çatdırmaq imkanında olduğuna hamını əmin etməyə çalışır.
Belə görünür ki, "Qazprom” 2016-cı ilin sonuna qədər kəmərin Türkiyə-Yunanıstan sərhədinə qədər olan hissəsini başa çatdırmaq istəyir.
Bundan əvvəl "Qazprom”un idarə heyətinin sədr müavini Aleksandr Medvedyev bildirib ki, "Türk axını”nın tikintisi 2020-ci ildə başa çatacaq. Yəni həmin tarixdə kəmərlə nəzərdə tutulan qaz nəqli ildə 63 milyard kubmetr olacaq. Bu həcmin 13-14 milyard kubmetrini Türkiyə alacaq, qalanı isə Yunanıstana, o cümlədən qalan Avropa ölkələrinə satılacaq.
"Türk axını” kəmərinin Cənub Qaz Dəhlizinə alternativ olmadığı deyilsə də bütün bu baş verənlər onu təsdiq edir ki, Avropanın qaz bazarı uğrunda amansız mübarizə gedir. "Qazprom” bu bazarda mövqelərinin azacıq da olsa zəifləməsinə imkan vermək istəmir. (virtualaz.org)
Xəbərdən istifadə edərkən istinad etmək vacibdir.
