Etibar Əliyev: "Diaqnostik qiymətləndirmə orta məktəb müəllimlərimizi arxayın salmamalıdır”; Firudin Cəlilov: "Bunu 20 il öncə etmək lazım idi”
"Müəllimlərin diaqnostik qiymətləndirilməsi müvafiq qaydaya uyğun olaraq ölkənin digər şəhər və rayonlarında da aparılacaq. Bundan sonra strategiyaya uyğun şəkildə əmək haqqı islahatının ikinci mərhələsinə - diferensial, yəni peşəkarlıq səviyyəsindən və əməyin nəticələrindən asılı olan əmək haqqı sisteminə keçməyi planlaşdırırıq”.


Bunu təhsil naziri Mikayıl Cabbarov Gülüstan sarayında sabiq prezident Heydər Əliyevin anadan olmasının 93-cü ildönümü münasibətilə təşkil olunan "Ən yaxşı təqdimat” müsabiqəsi qaliblərinin mükafatlandırılması mərasimində çıxışı zamanı deyib. Nazir bildirib ki, müəllim əməyinin stimullaşdırılması ilə bağlı son 2 ildə atılan addımlar bu peşənin nüfuzunun yüksəldilməsində dönüş nöqtəsi olub: "Belə ki, 2014-cü ildə Bakı şəhərində 30 min, 2015-ci ildə ölkənin 3 şəhər və 9 rayonunda 26 min müəllimin bilik və bacarıqlarının diaqnostik qiymətləndirilməsi aparılıb. Beləliklə, ölkə üzrə müəllimlərin 40 faizinin dərs yükü 1,5 dəfə, vəzifə maaşı isə 2 dəfə artıb. Nəticədə müəllimlərin orta aylıq əmək haqqı ölkə üzrə müvafiq göstəriciyə yaxınlaşıb”. M.Cabbarov eyni zamanda müəllim-şagird nisbətində əsaslı irəliləyişlərə nail olunduğunu da xatırladıb: "Bu göstərici 2012-2013-cü tədris ili ilə müqayisədə 2015-2016-cı ildə 1:10-dan 1:12 nisbətinə yüksəlib”.

Ekspert bildirdi ki, diaqnostik qiymətləndirmə orta məktəb müəllimlərimizi arxayın salmamalıdır: "Biliyin bundan sonrakı qiymətləndirməsində əmək haqqı və dərs yükünün artımı 1-ci diaqnostik qiymətləndirmə kimi olmayacaq. Daha mürəkkəb proses olan attestasiya isə qaçılmazdır. Məktəblərdə bilikli müəllimlər qalıb çalışmalıdır. Kənarda qalanlar isə səbəbi başqa yerdə axtarmamalıdırlar. Hazırkı orta məktəb müəllimləri onu da nəzərə almalıdırlar ki, son bir neçə ildə müəllimlik peşəsini seçənlər daha yüksək balla ali məktəblərə daxil olurlar. Bu səbəbdən rəqabət mühiti də artıq formalaşmaq üzrədir. Gələcəkdə müəllim biliklərinin qiymətləndirilməsinin əməyin diferensasiyasına yönəli olmasını hər bir müəllim anlamalıdır”.

Sabiq təhsil naziri Firudin Cəlilov isə bunun düzgün, lakin gecikmiş qərar olduğunu dedi: "Bunu 20 il bundan öncə etmək lazım idi. Məsələ ondadır ki, bu attestasiyanı aparanları kimlər müəyyənləşdirəcək və kimlər aparacaq, bu bir az şübhə doğurur. Müəllimlər müxtəlif olur. Şagirddən, tələbədən soruşmaq lazımdır ki, bu müəllim necə dərs deyir. Yəni müəllimin qiymətləndirmə mərhələsi əvvəlcə tələbədən, şagirddən başlanmalıdır. Müəllim sonradan komissiyadan keçməli, test imtahanı verməlidir. Yəni müəllimlər mütləq dərəcələrə ayrılmalıdır. 1-ci, 2-ci , 3-cü dərəcəli müəllimlər olmalıdır və onların maaşı arasındakı fərq çox böyük olmalıdır. Bu şərait yarananda təbii ki, o zəif müəllimlər öz üzərilərində işləyəcək və çalışacaq ki, maaşa görə yuxarı kateqoriya alsın. Kim özünü yüksək dərəcəyə çatdıra bilmirsə, o çıxıb gedəcək. Çünki əgər 1-ci dərəcəli müəllim 500 manat maaş alırsa, buna isə 200 manat maaş verirlərsə və bu özünü o həddə çatdıra bilmirsə, 1-2 ildən artıq qala bilməyəcək. Yəni məktəblərdə ələnmə başlayacaq. Bu sistemə çoxdan keçmək lazım idi”. 

Günel MANAFLI

Musavat.com