Sumqayıtın daşınmaz əmlak bazarından durğunluq hökm sürür. Bildirilir ki,  bu bazar adətən xaricidə yaşayan, xüsusən də Rusiyada işləyən həmyerlilərimizin aktivliyi sayəsində canlanırdı. Son zamanlar isə iqtisadi proseslər, Rusiyada yaşayan azərbaycanlıların gəlirlərinin azalması Sumqayıtın mənzil bazarına da təsirsiz ötüşməyib. Bu səbəbdən də şəhərdə evlər ucuzlaşıb. Bu, özünü daha çox köhnə tikililərdə göstərib. Ucuzlaşmaya baxmayaraq alıcılıq qabliyyətinin yenə də aşağı olduğu bildirilir. "Xruşov” layihəli binalardakı mənzillər daha aşağı qiymətə təklif olunur. Bu mənzillər digər layihələrə nisbətən ucuz satılır. Belə layihəli binalarda bir otaqlı mənzili 30 minə, ikiotağlını 40, üçotağlını isə 55 mindən başlayan qiymətlə almaq olar. Ev alqı-satqısı ilə məşğul olanlar deyir ki, hazırda ay ərzində 1 evi belə satmaq çətinləşib. Evlərin qiymətinin aşağı düşməsi isə kirayə qiymətlərinə də təsir edib. Bazarda rast gəlinən tək-tük ev axtaranlar isə qiymətlərin cibə uyğun olmadığını deyirlər. Elə Gülağa Hüseynov kimi. Ekspertlərin sözlərinə görə, mövcud vəziyyət daşınmaz əmlak bazarının tənəzzülə doğru getdiyini göstərir. Ekspert bildirir ki, Sumqayıtda mənzil sahibi olmaq istəyənlər otaq sayından asılı olaraq 30-70 min arası pul xərcləməlidir. Yaxın aylarda mənzil bazarındakı qiymətlərin kəskin enməsi proqnozlaşdırılmır. Müşahidələr isə onu göstərir ki, daşınmaz əmlak bazarındakı durğunluq hələ bir  müddət davam edəcək.

RAMİL ZEYNALLI