Əmlak Məsələləri Dövlət Komitəsi (ƏMDK) oktyabrım 17-də dövlət əmlakının özəlləşdirilməsi üzrə növbəti hərracını keçirəcək.
Komitədən Xeberle.com-a verilən məlumata görə, hərraca 43-ü kiçik dövlət müəssisə və obyekti, 78-i istifadəsiz qeyri-yaşayış sahəsi, 20-si səhmdar cəmiyyəti, 8-i isə nəqliyyat vasitəsi olmaqla ümumilikdə 149 dövlət əmlakı çıxarılacaq.
Hərraca çıxarılan səhmdar cəmiyyətləri arasında pambıqçılıq, quşçuluq, kəndkimya, nəqliyyat, inşaat, təmir, ticarət, istehsal, emal və sair sahələrə aid müəssisələr - "Azinterservis”, "Bərdə Kərpic”, "Tərtər Konserv”, "Azərmetalinvest", "Oğuz Kəndkimya”, "Çatal Broyler" və digərləri var. Onların səhm paketləri nizamnamə kapitalının 30-45%-ni təşkil edir. İlkin start qiyməti ən çox olan əmlak "Azinterservis” ASC-dir. Onun səhmlərinin 31%-ə yaxını 266 min manata təklif olunur. Bundan başqa qiymətində digərlərindən fərqlənən əmlak "Bərdə Kərpic” ASC-dir. Həmin əmlakın 30% səhmi isə 175 512 manata yaxın təklif olunur.
Hərraca çıxarılan kiçik dövlət müəssisəsi və obyektləri məişət, iaşə, qida, toxuculuq, təmir, sənaye, nəqliyyat və digər sahələrinə aiddir. Bu əmlaklar paytaxtla yanaşı Gəncə, Yevlax, Şəki, Şəmkir, Tərtər, Yardımlı, İmişli və digər rayonlarda yerləşir. Özəlləşdirilən əmlakların ümumi faydalı sahəsi 14 -1 274 kv.m arasında dəyişir. Hərracda ən yüksək qiymətə özəlləşdirməyə çıxarılan kiçik dövlət müəssisəsi Sumqayıtda yerləşən 22 saylı mağazadır. Adı çəkilən əmlak 217 857 manata təklif edilir. Onun ümumi faydalı sahəsi 600 kv.m-ə yaxındır. Qazax ərazi yun tədarükü və qəbulu idarəsi, paytaxtın Sabunçu rayonunda yerləşən mağaza da qiyməti ilə seçilənlər sırasındadır.
Hərracda fəaliyyətini yenidən qurmaqla daha çox gəlir gətirə biləcək əmlaklar sırasında Bakının Sabunçu rayonunda yerləşən 63 saylı mağazanı nümunə kimi göstərmək olar. Əmlakın ümumi faydalı sahəsi 300 kv.m-ə yaxındır və torpaq sahəsi ilə birgə özəlləşdirilir. Bundan başqa İmişlidə yerləşən 26 saylı yeməkxana da sahibi üçün iaşə sahəsində gəlirli hesab olunur.
Özəlləşdirilməyə açıq elan edilən istifadəsiz qeyri-yaşayış sahəsindən isə 62-i paytaxtda, qalanları isə respublikanın digər şəhər və rayonlarda yerləşir. Ən yüksək ilkin satış qiyməti paytaxtın Səbail rayonunda yerləşən qeyri-yaşayış sahəsinə təklif olunub. Belə ki, bu əmlak 230 min manat start qiyməti ilə hərraca çıxarılıb. Belə əmlakların sahəsi 13 - 300 kv.m arasında dəyişir.
Qeyd edilməlidir ki, daha az investisiya tələb edən əmlaklar da hərraca çıxarılıb. Bunlardan paytaxtın Xətai rayonunda yerləşən 15 kv.m olan qeyri yaşayış sahəsini nümunə kimi göstərmək mümkündür. Həmin əmlakın ilkin start qiyməti 2 000 manat təşkil edir. Həmçinin paytaxtın Nəsimi rayonunda yerləşən, sahəsi 16 kv.m, ilkin start qiyməti 2 250 manat təşkil edən qeyri-yaşayış sahəsini də bu kateqoriyaya aid etmək olar.
Hərraca çıxarılan nəqliyyat vasitələrinin markaları müxtəlifdir. Onların ilkin start qiyməti isə 1 080 - 4 min manat arasında dəyişir.
Hərraca çıxarılan əmlaklar haqqında ətraflı məlumatı aşağıdakı linkdən əldə etmək mümkündür.
http://privatization.az/index.php/az/component/content/article?layout=edit&id=2596
Xəbərdən istifadə edərkən istinad etmək vacibdir.
