Azərbaycanda Aİ-95 markalı benzinin istehsalı dayandırılması barədə məlumat vermişdik. Bununla bağlı bu gün jurnalistlərə ARDNŞ prezidenti Rövnəq Abdullayev bildirmişdi. O, hökumətə Aİ-95 markalı benzinin istehsalını dayandırmaq və tam şəkildə Aİ-92 markalı benzinin istehsalına keçmək barədə təklif verdiklərini deyib.
FaktXəbər-in məlumatına görə, bununla bağlı açıqlama verən iqtisadçı-ekspert Samir Əliyev qeyd edib ki, ARDNŞ prezidenti Rövnəq Abdullayevin Aİ-95 markalı benzinin ölkədə istehsalının dayandırılması və idxal edilməsi ilə bağlı fikirlərində təhlükəli məqam var: “Əvvəlcə, qeyd edim ki, bu açıqlama avto-kreditlərin dayandırılmasının benzin istehlakı ilə bağlı olması fikrimizi bir daha sübut etdi. Təhlükə isə ondan ibarətdir ki, Aİ-95 markalı benzinin idxalı onun qiymətinin bahalaşmasına gətirib çıxar bilər. Çünki Tarif Şurası bildiyiniz kimi Azərbaycanda istehsal olunan yanacağın qiymətini tənzimləyir. Aİ-95 markalı benzin isə idxal olunarsa, deməli Tarif Şurası onun qiymətini tənzimləməyəcək. Necə ki, Aİ-98 markalı benzində bunu görürük.
Rövnəq Abdullayevin təklifi qəbul edilərsə, Aİ-95 markalı benzinin bahalaşması üçün hökumətin əlində şans olacaq.”
Qeyd edək ki, hazırda Aİ-95 benzininin pərakəndə satış qiyməti 1 litr üçün 80 qəpik, Aİ-92 və Aİ-80 markalı avtomobil benzininin qiyməti isə 1 litr üçün 70 qəpikdir.
Xəbərdən istifadə edərkən istinad etmək vacibdir.
