Bu sözləri Xeberle.com-a açıqlamasında iqtisadçı Natiq Cəfərli Tarif Şurasının ötən gecə nəqliyyat vasitələrində qiymət artımı ilə bağlı verdiyi qərara münasibət bildirərkən deyib. Onun sözlərinə görə, kommunal xidmətlərdə də ilin sonuna yaxın, yaxud növbəti il müəyyən artımın olması ehtimalı yüksəkdir:

"Bu qiymət artımı bir gözlənti formalaşdırır və digər sahələrdə qiymət artımının olması ehtimalı yüksəlir. Mən düşünürəm ki, ilin sonunda dizel yanacağının qiymətinin artması ilə bağlı qərar verilə bilər. Çoxdandır bu söhbət müzakirə olunur və Azərbaycanda dizel yanacağının istehsalı da kəskin şəkildə azalıb. Çünki 92 markalı benzin istehsal etmək daha sərfəli hala gəlib, qiyməti də bahadır (0.90 AZN). Amma dizel 0.60 AZN-ə satılır. Ona görə də bu yanacaq növü ilə bağlı müəyyən qərarların verilməsi ehtimalı var. Mənim fikrimcə dizel yanacağının hər litri üçün təqribən 0.10-0.20 AZN civarında qiymət artımı ola bilər. Xatırlayırsınızsa, Mingəçevir hadisələrindən sonra müxtəlif məmurlar açıqlama vermişdilər ki, Azərbaycanda elektrik sistemini müasirləşdirmək, yeni təmir işlərinin aparılması üçün yüz milyonlarla vəsaitə ehtiyac var. Ola bilər ki, bu bir anons idi ki, gələcəkdə elektrik enerjisinin qiymətinin artırılması yolu ilə qoyulacaq vəsaitin böyük bir qismini vətəndaşın hesabına ödənilməsi düşünülə bilər. Bu səbəbdən kommunal xidmətlərdə də ilin sonuna yaxın, yaxud növbəti il müəyyən artımın olması ehtimalı yüksəkdir”.

Elnarə Salamova

Xeberle.com