"Dağlıq Qarabağ münaqişəsi iqtisadi inkişafa mane olur”.

Azərbaycan "Forbes” jurnalının 2014-cü ildə "Biznes üçün ən yaxşı ölkələr” reytinqində keçən illə müqayisədə 7 pillə irəliləyərək 146 ölkə arasında 60-cı yeri tutub.

Jurnal qeyd edir ki, Azərbaycanın yüksək iqtisadi inkişafı artan nef və qaz ixracı ilə yanaşı, tikinti, bank və daşınmaz əmlak sahələrinin də ikiqat artımının hesabına baş verib.  

"Bakı-Tbilisi-Ceyhan, Bakı-Novorossiysk və Bakı-Supsa kəmərləri vasitəsilə neft ixracı əsas iqtisadi faktordur, Azərbaycanın qaz ixracının artırılması ilə bağlı işlər isə davam etdirilir. Geosiyasi əhəmiyyətə malik olan Azərbaycan və Avropa arasında Cənub Qaz Dəhlizi ilə bağlı işlər yekunlaşandan sonra qazın ixracından gələn gəlirlərin mənbəyi artacaq,” nəşrdə deyilir.

Forbes davam edən Dağlıq Qarabağ münaqişəsini Azərbaycanın iqtisadi inkişafına mane olan amil kimi qiymətləndirib.

Nəşr daha sonra qeyd edir ki, Azərbaycanın keçmiş sovet ölkələri və Rusiya ilə ticarət göstəriciləri azalır, Türkiyə və Avropa ölkələri ilə bu əlaqələr inkişaf etdirilir.

Reytinqə əsasən, biznes üçün ən yaxşı ölkə Danimarkadır. İlk üçlüyə həmçinin Honq Konq və Yeni Zelandiya daxil olub. (oxu.az)