İsveçrənin treyder şirkəti "Glencore” Rusiyanın özəl neft şirkəti olan "Russneft”in səhmlərinin 49 faizinin alınmasına dair sövdələşmə əldə edib.

Bu haqda "Russneft”in sahibi, inquş milyarder Mixail Qutseriyev "Rossiya 24”ə müsahibəsində danışıb.

"Russneft” şirkəti Qutseriyevin Azərbaycandakı aktivlərini də idarə edən "Neftis” şirkəti ilə birləşəndən sonra səhmlərinin yarıdan azını İsveçrə şirkətinə satacaq. Qutseriyevin Azərbaycanda iri neft biznesi var.

2008-ci il, fevralın 3-də M.Qutseriyevin Londonda başqasının adına şərti olaraq yaratdığı, öz strukturlarında "Abşeron Operating Companu Limited” ("Zığ” və "Hövsan” yataqlarını işləyir), "Karasu Operating Companu” ("Kəlamətdin” və "Mişovdağ”), "Kura Valey Operating Companu” ("Padar-Hərəmi”), "Neftçala İnvestments Limited” ("Neftçala”, "Xıllı”, "Durovdağ-Bazanan”), "Binagadi Oil Companu” ("Binəqədi”, "Qırmakı”, "Çaxnaqlar”, "Sulutəpə”, "Masazır”, "Fatmayı”, "Şabandağ” və "Sianşor”) şirkətlərini birləşdirən "Qlobal Enerji Azərbaycan Ltd.” şirkəti ARDNŞ-lə hasilatın pay bölgüsü (HPB) tipli 16 yatağın işlənməsi üzrə 2 neft kontraktı imzalayıb. Bu aktivlər sonradan "Neftis” şirkətinə verilib.

Qutseriyev deyib ki, səhmlərin "Glencore”yə satılmasına dair danışıqlar gedir və məsələ həllini tapmaq üzrədir. İndi bu sövdələşmənin Federal Antiinhisar Komissiyasından keçməsi lazımdır.

"Biz indi Federal Antiinhisar Komissiyasından icazə alacağıq, daha sonra bütün törəmə strukturlar baş şirkətə konvertə ediləcək, müqavilə bağlanacaq”- deyə Qutseriyev bildirib.

İnquş milyarder deyib ki, "Glencore”nin "Rossneft”in səhmlərini alması xarici investorların sanksiyalara görə Rusiyadan qaçmaq fikrində olmadığını göstərir. Qutseriyev hazırda "Rossneft”in və "Neftis”in dünya bazarlarında neftin qiymətlərinin qeyri-sabit olmasına görə bütün investisiya proqramlarını dayandırdığını açıqlayıb.

"Ancaq cari neft hasilatını saxlamaq üçün investisiya yatırırıq”- deyə oliqarx bildirib.

Bu günlərdə Qqutseriyev "Rossneft”in prezidenti postunu tərk edib və şirkətin Direktorlar Şurasına rəhbərlik etməyə başlayıb. O, bu yerdəyişməni şərh edərkən deyib ki, yeni vəzifədə xarici ölkələrdəki layihələrə daha çox vaxt ayıra biləcək.

"Bu dəyişikliyi bütün aktivlərə, bütün strukturlara nəzarət edə bilmək üçün etdik. Mən təkcə Rusiyada deyil, Azərbaycan, Mavritaniya, Qazaxıstan və digər ölkələrdə də aktivlərə malikəm. Bəzi ölkələrdə böhran olmadığı üçün işləmək olar”- deyə maqnat əlavə edib.

Hesablamalara görə, "Rossneft”in bazar dəyəri hazırda 18 milyard dollara yaxındır.  (Virtualaz.org)