Bu gün "Azərikimya” İstehsalat Birliyində ekoloji məsələlərin həllinə həsr olunmuş mətbuat konfransı keçirilib. Respublika və yerli mətbu orqanlarının, həmçinin xəbər saytlarının nümayəndələrinin iştirak etdiyi mətbuat konfransında İB-nin İcraçı direktorunun Əməyin mühafizəsi və ətraf mühitin qorunması üzrə müavini Vüqar Kərimov bildirib ki, Etilen-polietilen zavodunda əsasən bərk, maye və qaz tullantıları formalaşır. Bərk tullan­tılar zavodun ərazisində çeşidlənərək, hər biri üçün xüsusi olaraq ayrılmış konteynerlərə yığılır və müqavilə əsasında tullantı mərkəzlərinə daşınır: "Azərikimya” İB-nin müəs­sisələrində formalaşan bərk tullantıların zərərsizləşdirilməsi bağlanmış müqavilə əsasında Sumqayıt şəhər Təmizlik Departamenti, ARDNŞ-nin Tullantı Mərkəzləri, həmçinin Ekologiya və Təbii Sərvətlər Nazirliyinin "Təhlükəli tullantılar” poliqonu tərəfindən həyata keçirilir.”
İdarə rəsmisi qeyd edib ki, 2014-cü ildə 972 tondan artıq məişət və digər qeyri-toksiki tullantılar Sumqayıt şəhər Təmizlik Departamentinin poliqonuna daşınaraq zərərsizləş­diril­ib. ARDNŞ-nin "Tullantı Mərkəzi”nə isə 2011-ci ildən bəri 11 adda ümumilikdə 231 tondan artıq çeşidlənmiş tullantı təhvil verilib. Uzun illərdən bəri toplanmış 57 915 m3 civə şlamı Ekologiya və Təbii Sərvətlər Nazirliyi­nin dünya standartlarına cavab verən «Təhlükəli Tullantılar» MMC-nin poliqo­nu­na daşınaraq zərərsizləşdirilib: "Beləliklə də müəssisənin, demək olar ki, bütün ərazisi bu zərərli və zəhərli tullantıdan təmizlənib. 2010-cu ildən etibarən «Təhlükəli Tullantılar» poliqonuna 108 adda 579 tona yaxın müxtəlif növ kimyəvi tullantılar daşınaraq zərərsiz­ləş­dirilib. Bunun da 214.5 tonu 2014-cü ilə təsadüf edir.”
V.Kərimov jurnalistləri maraqlandıran suala da cavab verib: "Bu gün atmosferə "Azərikimya” İB-nin müəssisələri tərəfindən ictimaiyyəti və şəhər sakinlərini narahat edə biləcək heç bir zərərli və zəhərli tullantı buraxılmır"

Xeberle.com

Redaksiyadan: Xatırladaq ki, bir neçə gün öncə Sumqayıtın bir qrup jurnalisti artıq 2-ci dəfə Sumqayıt şəhər Təmizlik Departamentinin balansında olan və şəhər mərkəzindən təxminən 3-4 km aralıda yerləşən məişət tullantıları poliqonundan məişət tullantılarının yandırılması (yaxud öz-özünə yanması) olayı ilə rastlaşaraq geniş videoreportaj hazırlamışlar. Bu hadisədən sonra Sumqayıtda ekoloji sahədə ciddi problemlərin olması faktı aşkarlanıb, hətta bu işə məsul olan şəxslər də problemi etiraf ediblər.