"Sumqayıtın gələcəyini daha da inkişaf etmiş şəhərlər sirasinda görmək istərdim”
Bakı Bələdiyyə Teatrının aktrisası Zülfiyyə Qurbanovanın  Xeberle.com-a müsahibəsini təqdim edirik.
- Gəlin ilk öncə sizi aktrisalığa gətirən yoldan danışaq.
- Açığı, mən aktrisalığı uşaqlıqdan arzulayanlardan olmamışam. Mən rəssam olmaq istəyirdim. Hətta uşaq vaxtı Sumqayıt şəhərində Bülbül adına 2 nömrəli orta ixtisas məktəbinin rəssamlıq söbəsində də oxumuşam. Amma orta məktəbi bitirən kimi birdən-birə fikrimi dəyişib, Azərbaycan Dövlət Mədəniyyət və İncəsənət  Universitetinin Aktyorluq fakültəsinə sənədlərimi verdim, 2003-cü ildə Universitetin "Dram teatrı və kino aktyorluğu " fakültəsinə daxil oldum. Oranı 2007-ci ildə bitirdim və Universitetin magistraturasını eyni ixtisas üzrə başa vurdum. Ödənişsiz və rüşvət vermədən oxuyanlardanam. 2007-ci ildən Bakı Bələdiyyə Teatrında çalışıram. Açığı, hər şey, yəni aktyorluğa gəlmək fikrim qəfildən oldu. Təbii ki, uşaqlıqdan canımda incəsənətə meyillilik olub. Çünki incəsənət insanlarının olduğu ailədə böyümüşəm. Aktrisa olmaq qərarının qəfil verilməsinə baxmayaraq, 3 il universitetə sənədlərimi vermişəm. Yəni, heç nə əziyyətsiz olmayıb.
-Ailədə sizə dəstək oldular?
- Bəli ailədə mənə dəstək oldular. Və hər zaman da dəstəklədilər. Həmişə də onların mənəvi dəstəyini hiss edirəm.
-Aktrisaların bir çoxu həm də aparıcı kimi fəaliyyət göstərirlər. Sizi də nə vaxtsa aparıcı kimi görə biləcəyikmi?
- Əlbəttə, görə bilərsiniz. Çünki bunun da bilavasitə bizim sahəyə aidiyyəti var. Gələcəkdə maraqlı veriliş təklifi olarsa, bunu dəyərləndirərəm. Çünki mən efirdə olmasa da, tədbirlərdə kifayət qədər aparıcılıq eləmişəm, hazırda da edirəm.
-Bakı Bələdiyyə teatrında fəaliyyət göstərirsiniz. Teatrda vəziyyət necədir?
- Bakı Bələdiyyə Teatrında 2007-ci ildən çalışıram. Hazırda teatrda vəziyyət yaxşıdır. Sadəcə hər kəs bilir ki, bizim bina problemimiz var. Amma buna baxmayaraq məşqləri dayandırmırıq. Daim fəaliyyətdəyik.
-Teatra gələn tamaşaçı marağı sizi qane edirmi?
-Əvvəlki illərə nisbətən indi tamaşaçı marağı  qənaətbəxşdir. Amma düzü, bir ara teatra maraq çox azalıb. İndi şükür ki, yavaş-yavaş irəliləyiş hiss olunur.
-Bir çox seriallarda gözəl obrazlar yaratmısınız. Daha çox serialda çəkilməyi xoşlayırsınız, yoxsa teatrda oynamağı?
- Mən hər ikisində də özümü əla hiss edirəm. Hər şeyin başında işlədiyin işi, seçdiyin sahəni sevmək durur. Mən teatrı da sevirəm, kamera qarşısında  çəkilməyi də. Ayıra bilmirəm, doğmadırlar. Serialın, filmin bu işi var ki, səni çox geniş kütlə tanıyır. Amma teatrda sənin tamaşana gəlib baxanlar səni tanıyır.
-Zülfiyyə xanım, "Aktyor rejissordan asılıdır” ifadəsinə münasibətiniz?
-Açığı asılılıq sözünü sevmirəm. ''Asılıdır''- deyəndə ki, hər ikisi gördükləri işin gözəl, keyfiyyətli alınmasını istəyirlər. Mən aktrisa kimi işimin, mənə verilən rolun öhdəsindən gələ bilməsəm, ilk oncə söz mənə deyiləcək ki, bacarıqsızdır.  Sonra da rejissorun ünvanına deyəcəklər ki, seçdiyi aktrisaya, və ya aktyora bax. Ona görə sənət müəllimim xalq artisti Ağakişi Kazımov hər zaman bu sözləri qulağımızda sırğa eləmişdi: "Yaxşı və ya pis aktyor yoxdur. Ya aktyor var, ya da yoxdur ...”  Rejissor  hər zaman çalışdığı aktyoru və ya aktrisasını sevməlidir. Eləcə də aktyor üçün bu, keçərlidir. Yəqin ki, hansı sevgidən danışdığım məlumdur. Arada sevgi, hörmət olanda iş də gözəl olur. Bu danılmazdır.
-Çəkildiyiniz seriallarda hansı obrazı daha əziz hesab edirsiniz?
-Bütün rollarımı sevmişəm. Amma sevmədiklərim də olub. İndi ancaq sevdiyim rolları oynayıram. İki ildir bir qızı sevirəm, Ağcanı.
-Elə Ağca demişkən, sizi daha çox müsbət rollarda görmüşük. Çəkildiyiniz "Həyat sən nə qəribəsən" serialında isə mənfi obraz yaratmısınız. Bununla tamaşaçıların sevgisini itirməkdən qorxmadınız?
- Düzü müsbət rollarım da olub, mənfi də. Hazırda  "Xəzər” TV-nin efirində yayımlanan "Həyat sən nə qəribəsən” serialında Ağca roludur. Düzdür, mənfi roldur. Amma qorxmuram. Nifrət belə uğurdur. Əksinə, o mənfi rolla, o nifrətlə mən sevgi qazandım, nəinki sevgini itirmək. Bu da mənə stimul verir. Mənfi rol oynadığına baxmayaraq, səni sevirlərsə, sənin aktrisa kimi gözəlliyini görürlərsə, bu, uğurun özüdür. Çünki mənfi roldakı insanları çox nadir hallarda sevgi ilə qarşılayırlar. Çox az aktyora nəsib olur bu xoşbəxtlik. Bəlkə də ifadəm bir az qəribə səslənə bilər, özümdən razılıq kimi. Amma əsla belə deyil ...
- Heç olubmu yaratdığınız Ağca obrazına haqq qazandırasınız? Axı ortada böyük bir sevgi var, Ağca da sevgi qurbanıdır.
- Əlbəttə, haqq qazandırmışam, qazandırıram da. Çünki bütün mənfi rollarda mütləq haqq qazandırılacaq nəsə olur, olmalıdır. Mən oynadığım rola haqq qazandırmasam, oynaya bilmərəm. Elədiklərinin düzgün olmadığını bildiyim şeylərdə belə haqq qazandıraraq oynamışam. Onun alqışlanmayacaq hərəkətlərini haqq qazandıraraq oynamasaydım və ya hal-hazırda oynamasam, tamasaçı bu tərəddüdü həmən dəqiqə hiss edəcək. Bu da artıq uğursuzluqdur. Ağcanı oynayarkən yaddaşımda  hər zaman bu sözlər olur: "Sevgidə və müharibədə bütün yollar mübahdır”
-Özünüzə ən çox nəyi irad tutursunuz?
- Aşırı dəyər verirəm insanlara. Hamı dəyişir. Mənim aşırı dəyərim özgüvən verir hər kəsə. Amma bunu eləmək lazım deyil. Bu dəyər insanın özünün dəyərsizləşməyinə gətirib çıxarır.
-Sumqayıt şəhərində yaşayırsınız. Hər gün Bakı-Sumqayıt yolu sizi yormur ki?
- Açığı alışmışam. 13 ilə yaxındır ki, eyni yolu gedib-gəlirəm. Artıq vərdiş eləmişəm.
- Nə vaxtsa Sumqayıtı tərk etmık fikriniz varmı?
- Dəqiq bilmirəm. Mən vərdiş insanıyam. Vərdişlərimə, öyrəşdiyim şeylərə çox bağlıyam. Amma, kim bilir, bəlkə bir gün gələcək, nəinki Sumqayıtı, bəlkə də elə Azərbaycanı tərk edəcəyəm. Həyat elə gətirə bilər ki... Kim bilir, qismət...
- Bəs, hazırda yaşadığınız, vərdiş etdiyiniz Sumqayıtın gələcəyini necə görmək istərdiniz?
-Sumqayıtın gələcəyini daha da inkişaf etmiş şəhərlər sırasında görmək istərdim. Çünki mən bu şəhərdə göz açmışam. Onsuz da çox təmiz şəhərdir Baxmayaraq ki, deyirlər sənaye şəhəri olub, amma müşahidə və müqayisə eləsək başqa şəhərlərdən təmiz, gözəl şəhər olduğunu görərik.
-Zülfiyyə xanım, müsahibəyə görə çox sağ olun. Sizə çoxlu uğurlar arzu edirik.
- Çox təşəkkürlər. Sizə də uğurlar.

Zeynəb  Abullah
Xeberle.com