Sumqayıt Dövlət Rəsm Qalereyasında rəssamlarla görüş təşkil edilib.
Azərbaycanın Xalq rəssamı, professor, tanınmış miniatürçü-rəssam, ədəbi əsərlərin qrafik rəssamı Arif Hüseynov şəhərdə fəaliyyət göstərən rəssamların qonağı olub. Səmimi və yaradıcı söhbətlərlə zəngin görüş Sumqayıt Dövlət Rəsm Qalereyasında reallaşıb.
Müəssisənin direktoru Ellada Həsənova AZƏRTAC-a bildirib ki, görüşdə Arif Hüseynovun geniş və rəngarəng yaradıcılıq aləmindən söz açılıb. Qeyd edilib ki, görkəmli qrafika ustasının əsərləri hazırda Azərbaycan Milli İncəsənət Muzeyində, Moskva Dövlət Şərq Xalqları İncəsənət Muzeyində, Azərbaycan Dövlət Rəsm Qalereyasında, həmçinin şəxsi kolleksiyalarda saxlanılır.
Arif Hüseynov yaradıcılığı, fərdi və qrup sərgiləri, işləmə texnikası barədə danışıb, əldə etdiyi nailiyyətlərdən söz açıb, dünya rəssamlıq sənəti haqqında fikirlərini bölüşüb. Görüşdə rəssamların sənət uğurları, qayğıları, yeni yaradıcılıq planları, habelə, ümumən respublikamızda rəssamlıq sənətinə rəssamların töhfələri mövzusunda fikir mübadiləsi aparılıb.
Xəbərdən istifadə edərkən istinad etmək vacibdir.
