Bu gün Sumqayıtda Şəhər Mədəniyyət Evində "Dünyanı nurlandırar uşaq sevinci” adlı bayram konserti keçirilib. "Uşaqların Beynəlxalq Müdafiəsi Günü"nə həsr olunmuş tədbirdə Sumqayıt Mərkəzi uşaq kitabxanası və Corat Mədəniyyət evi uşaq ədəbiyyatının rəngarəng nümunələri və fəal oxucularının bayram töhfəsi ilə çıxış ediblər. Bayram tədbirində 4 və 22 saylı uşaq bağçalarının, eləcə də 5və 25 saylı tam orta məktəbin şagirdləri iştirak ediblər. Sumqayıt Rəsm Qalereyasının yaradıcı uşaqların əl işlərindən ibarət rəsm sərgisi ilə qatıldığı tədbirdə nağıl qəhramanları Ayı və Maşa, şən klounlar və digər nağıl personajları maraqlı çıxışları ilə uşaqların zövqünü oxşayıblar.

Əvvəlcə tədbir iştirakçıları kitab sərgisi ilə tanış olublar. Mərkəzi uşaq kitabxanasının multimedia mütəxəssisləri Səbinə Qasımova , Elza Həsənova, Leyla Məmmədli sərgi haqqında tədbir iştirakçılarına ətraflıə məlumat veriblər.

Bədii hissədə isə sehirbazlardan Çingiz Həziyev və Nizami Kazımov öz rəngarəng çıxışları ilə uşaqları möcüzəli aləmə səyahətə aparıblar. Zaur Yusifli, Kamil Ağayev, Tünzalə Məmmədova və Sevda Akkaya mahnıları ilə uşaqları təbrik ediblər. Bu təbriklərə Mərkəzi uşaq kitabxanasının məktəbəqədər yaşlı oxucuları Rahid və Zəhra Əzizovlar, orta yaşlı oxuculardan Mələk Cəbrayılzadə də qoşulub. Onlar sülh, bayraq, uşaqlar haqqında şeirlər söyləyiblər. 
Tədbir uşaqların böyük marağına səbəb olub.