Türkiyənin paytaxtı Ankara şəhərinin Keçiören rayon bələdiyyəsinin təşkil etdiyi 6-cı Beynəlxalq Ramazan Şənlikləri çərçivəsində Azərbaycan Gecəsi təşkil olunub.

Azərbaycan Gecəsi münasibətilə sözügedən bələdiyyənin təşkilatçılığı və səfirliyimizin dəstəyi ilə 6-cı Beynəlxalq Ramazan Şənliklərinin keçirildiyi sahədə ölkəmizə xas olan tarixi, mədəni və incəsənət əsərlərinin nümayiş etdirildiyi Azərbaycan Evinin açılışı da olub.

Açılışı Keçiören rayon bələdiyyəsinin Sədri Mustafa Ak, Azərbaycanın Türkiyədəki səfiri Faiq Bağırov, Sumqayıt şəhər bələdiyyəsinin sədri Əbülfəz Babayev və AKP millət vəkili Orxan Atalay həyata keçiriblər.

Azərbaycan Gecəsində Sumqayıt şəhər Nəriman Nərimanov adına Mədəniyyət Mərkəzinin "Segah” muğam qrupu iştirak edib. Tədbir qrupun bir- birindən gözəl əsərlər səsləndirməsi ilə başa çatıb.

Tarda Elnur Əliyev, Kamançada Fərid Mehdiyev, nağarada Elnur Əliyev və AZTV-də keçirilən Muğam müsabiqəsinin laureatı, xanəndə Könül Əmirəliyevadan ibarət olan qrupun çıxışı tədbir iştirakçılarının böyük marağına səbəb olub və alqışlarla müşayət olunub.

Azərbaycanın Türkiyədəki səfiri Faiq Bağırov "Segah” muğam qrupuna ölkəmizi layiqincə təmsil etdiklərinə görə təşəkkür edib və gələcək fəasliyyətlərində uğurlar arzulayıb.

Xeberle.com