Sentyabrın 18-də Sumqayıt şəhər Mədəniyyət və Turizm İdarəsinin və Nəriman Nərimanov adına Mədəniyyət Mərkəzinin təşkilatçılığı ilə dahi bəstəkar Üzeyir Hacıbəyovun 130 illik yubileyi və Milli Musiqi günü ilə əlaqədar tədbir keçirilib. Nəriman Nərimanov adına Mədəniyyət Mərkəzində keçirilən tədbirdə Əhməd Bakıxanov adına Uşaq İncəsənət Məktəbinin müəllimlərindən və şagirdlərindən ibarət xalq çalğı alətləri ansamblı dahi bəstəkarın əsərlərindən parçalar ifa edib. Bununla yanaşı, Səid Rüstəmov, Fikrət Əmirov və Hacı Xanmmədovun, eləcə də aktyorların ifasında dahi bəstəkarın "O olmasın, bu olsun!” operettasından parçalar nümayiş olunub.

Tədbir ''Koroğlu'' uverturası ilə başlayıb. Ardınca monitorda Üzeyir Hacıbəyovun həyat və yaradıcılığı haqqında video-xülasə təqdim edilib. Daha sonra bir-birinin ardınca gözəl ifalar səsləndirilib: Sevinc İslamova - ''Sevgili canan'', "Arşın mal alan" operettasından xor, Gülzar Fərəcova - Səid Rüstəmov "Gəlmədim", Fəhmin Əhmədli - Səid Rüstəmov "Qurban adına", Fikrət Əmirovun "Gözün aydın komediyası"ndan rəqs, Firudin Ağayev - Fikrət Əmirov, "Kor ərəbin mahnısı", "O olmasın bu olsun" operettasından canlı kompozisiya və Fəhmin Əhmədli "Sənsiz" romansı.
Tədbir boyu mütəmadi olaraq dahi bəstəkarın həyat və yaradıcılığından məlumatlar verilib. Tədbir tamaşaçıların sürəkli alqışları şəraitində keçib.

Elnur Ağayev
Xeberle.com