Bu gün Sumqayıt Dövlət Rəsm Qalereyasında 31 dekabr-Dünya Azərbaycanlılarının Həmrəyliyi gününı həsr olunmuş "Ədəbi təsvir” adlı tədbir keçirilib. Tədbir Sumqayıt şəhər Mədəniyyət və Turizm idarəsi, Əli Kərim adına "Poeziya” klubu və Sumqayıt Dövlət Rəsm Qalereyası ilə birgə təşkil edilib. Tədbirdə Bülbül adına uşaq incəsənət məktəbinin rəssamlıq şöbəsinin şagirdlərinin və Nizami Gəncəvi adına kitabxana klubun rəsm dərnəyi üzvlərinin 28-ə yaxın əl işləri nümayiş edilib. Tədbirin keçirilməsində əsas məqsəd poeziyanı uşaqlara sevdirmək və bunu gələcək nəsillərə aşılamaqdır. Tədbirdə uşaq ədəbiyyatının nümayəndələri, şair Məmməd Namaz, Mirsabir, Ələsgər Həsənli, eləcə də şairlərdən İbrahim İlyaslı, Rəfiqə Şəms, Almaz Sahilə iştirak edib. Sumqayıt Dövlət Rəsm Qalereyasının direktoru Ellada Həsənova, N.Gəncəvi adına kitabxana klubun direktoru Zərnigar Babayeva, C.Cabbarlı adına mədəniyyət evinin direktoru Aygün Qəhrəmanova, eləcə də, şairlər çıxış edərək uşaqları təbrik edib, belə tədbirlərin sayının artırılmasının vacibliyindən danışıblar. Onlar bildiriblər ki, sözlə fırçanın vəhdəti hər zaman böyük əsərlərin ərsəyə gəlməsinə səbəb olub. Tədbirin sonunda uşaqlara şairlər tərəfindən kitab hədiyyə edilib və istedadlı uşaqların ifasında şeirlər dinlənilib.