Sumqayıt Dövlət Dram Teatrı aprel ayı üçün nəzərdə tutulan repertuara yeni bir tamaşanı da əlavə edib. Teatrın mətbuat xidmətindən Xeberle.com-a verilən məlumata görə, ötən həftə Abdulla Şaiqin "Tülkü həccə gedir” alleqorik nağılı əsasında rejissor Vasif Məmmədovun səhnələşdirdiyi "Əhmədin vəfalı dostu” tamaşasına daxili baxış olub. Tamaşanın premyerası isə aprelin 2-də baş tutub. Aktyorlar Yalçın Səlimov, İradə Zeynalova, Habil Xanlarov, Şəhla Məmmədova, Ceyhun Məhərrəmov və Kifayət Burziyevanın maraqlı oyun tərzi azyaşlıların diqqətini çəkə bilib. Qeyd edək ki, tamaşada teatr studiyasının tələbələrindən Etibar Əmiorov, Günəş Bağırova və Firuzə Şərifova oynadığı rolların öhdəsindən məharətlə gəliblər. Tamaşaçıların nəzərinə çatdıraq ki, bu yeni uşaq tamaşasına 22 aprel saat 11:00, 13:00, 23 aprel 12:00, 14:00-da baxa bilərlər.