Qubadlı rayon V.Əliyev adına mədəniyyət evində Sumqayıt Regional Mədəniyyət və Turizm idarəsinin zona müşavirəsi keçirilib.

 

Sumqayıt Regional Mədəniyyət və Turizm idarəsinin rəisi Mehman Şükürov müşavirədə çıxış edərək Rusiya Federasiyasına səfərin təəssüratlarını bölüşüb. Bundan əlavə, Mehman Şükürov musiqi məktəblərində yeni tədris ili ilə əlaqədar olaraq şagird qəbulunun vəziyyəti, dərs bölgüsü, tarifakisiya məsələrinə toxunaraq bütün musiqi məktəblərində müəllimlərlə görüşlər keçirəcəyini bildirib.

 

Mədəniyyət müəssisələrində aşkar olunan problemlərlə bağlı irad və təkliflərini bildirən idarə rəisi kitabxana, muzey, rəsm qalereyasının, həmçinin musiqi məktəblərinin də ödənişli fəaliyyətə keçirilməsinin zəruriliyini vurğulayıb. Müşavirədə həmçinin Sumqayıt Regional Mədəniyyət və Turizm idarəsinin tabe müəssisələrində Azərbaycan Respublikası Prezidentinin 4 avqust 2008-ci il tarixli, 2961 nömrəli Sərəncamı ilə təsdiq edilmiş "Azərbaycan kinosunun 2008-2018-ci illər üzrə inkişafına dair Dövlət proqramı"na və Mədəniyyət və Turizm Nazirinin müvafiq əmrinə əsasən 15.09.2017-ci il tarixdən etibarən filmlərin nümayişi ilə bağlı görüləcək işlər müzakirə olunub, ciddi tapşırıqlar verilib. Sonda Mehman Şükürov uşaq incəsənət və musiqi məktəbləri şagirdlərinin beynəlxalq festivallarda qazandığı uğurları, eləcə də Sumqayıt Regional Mədəniyyət və Turizm idarəsinin Qəbələ V Beynəlxalq Mürəbbə Festivalı və I Beynəlxalq Dolma Festivalında uğurlu iştirakını yüksək qiymətləndirib, təşəkkürünü bildirib.