Bu barədə Xeberle.com-a teatrın baş rejissoru Firudin Məhərrəmov məlumat verib. Rejissorun sözlərinə görə, açılış onun quruluşunda Turgut Özakmanın "Ocaq” tamaşasının premyerası ilə ediləcək: "Tamaşada bir ailənin iztirabı kontekstində cəmiyyətin müxtəlif təbəqələrinin baxış bucağı mükəmməl şəkildə əks olunur. Səhnə əsərində rol alan Əməkdar artistlər Növrəstə Həşimova, Fəranə Musayeva, İzaməddin Bağırov, Rauf Ağakişiyev, Cəlal Məmmədov, aktyorlar Oktay Mehdiyev, Xatirə Süleymanova, Sədaqət Nuriyeva, Habil Xanlarov, Şəhla Məmmədova, İlahə Səfərova, Şəmistan Süleymanlı və Amil Babayev psixoloji məqamları məharətlə ifa edirlər".

F.Məhərrəmov yeni mövsümdə teatrda olacaq yeniliklər barədə söhbət açıb: "Bundan başqa, bu mövsüm Hüseyn Cavidin 135 illiyi ilə bağlı "Xəzan yarpaqları” əsərini tamaşaya qoyacağıq.

Bu tamaşada Hüseyn Cavidin və onun ailəsinin başına gələnlər səhnələşdiriləcək və rollarda H.Cavidin özü, Əhməd Cavad, Mikayıl Müşfiq, Mircəfər Bağırov kimi şəxslərin obrazları canlandırılacaq. Daha sonra Nikola Algidonun "Dəmir sinif” əsəri və Cəfər Cabbarlının ildönümü ilə əlaqədar "Aydın” pyesinin səhnələşdirilməsi nəzərdə tutulub”. Qeyd edək ki, teatrda yeni mövsümün açılışı sentyabrın 27-də olacaq. Həmin gün saat 19:00-da Turqut Ozakmanın ''Ocaq'' tamaşasının premyerası keçiriləcək.