2005 və 2012-ci illərdə Prezident Mükafatına layiq görülüb.

Azərbaycanın aktyoru, bir çox filmləri  məharətlə səsləndirən Sabir Məmmədov bu gün 53 yaşını qeyd edir.

Oxu.Az xəbər verir ki, Sabir Novruz oğlu Məmmədov 24 yanvar 1961-ci ildə Qazax rayonunun Poylu kəndində anadan olub.

1983-cü ildə Azərbaycan Dövlət Mədəniyyət və İncəsənət Universitetinin Dram və kino aktyorluğu fakültəsini bitirib. Təyinatla Sumqayıt Dövlət Dram teatrına göndərilən Sabir Məmmədov, teatrın səhnəsində aşağıdakı rolları ifa edib:

Xoşbəxt adam (“Park”, Rüstəm İbrahimbəyov), 1-ci ərizəçi (“Lənkəran xanının vəziri”, Mirzə Fətəli Axundzadə), Hüseyn (“Bəxt üzüyü”, Vaqif Səmədoğlu), Toğrul (“Uca dağ başında”, Vaqif Səmədoğlu), Xəlil (“Müvəqqəti ər”, Rəşid Nuri Güntəkin) və s.

Sabir Məmmədov 1989-cu ildən Akademik Milli Dram Teatrının səhnəsində isə Səfər (“Gecə döyülən qapılar”, Nəbi Xəzri), Kumar (“Qanqın böyük dalğası”, C.Əfruz), Fərman (“Yalan”, Sabit Rəhman), Şahmar (“Dəlilər və ağıllılar”, İlyas Əfəndiyev), Saday bəy (“Hökmdar və qızı”, İlyas Əfəndiyev), Akkanad (“Sokratı anma gecəsi”, Çingiz Aytmatov), İlus (“Burla xatun”, Nəbi Xəzri), Teymur ağa (“Lənkəran xanının vəziri”, Mirzə Fətəli Axundzadə), Novruz bəy (“Aydın”, Cəfər Cabbarlı), Sarvan (“Bu dünyanın adamları”, Hidayət), Şair (“Kəllə”, Nazim Hikmət), Horatsio (“Hamlet”, Uilyam Şekspir), M.Ə.Sabir (“Hərənin öz payı”, X.Qoca), Dulu Xaqan (“Özümüzü kəsən qılınc”, Bəxtiyar Vahabzadə), Yavuz (“Afət”, Hüseyn Cavid), Oğlan (“Qatil”, Elçin), İsgəndər (“Ölülər”, Cəlil Məmmədquluzadə), Seyid Hüseyn (“Xurşidbanu Natəvan”, İlyas Əfəndiyev), Rəşad (“İkinci səs”, Bəxtiyar Vahabzadə), Fərəc (“Boy çiçəyi”, İlyas Əfəndiyev) rollarını canlandırıb.

O,  “Kamança” (Əbdüləli), “Qaçaq Süleyman” (Murad), “Yağışdan sonra” (Əmin), “Apardı sellər Saranı” (İgid), “Qırmızı qar” (Əsgər) teletamaşalarına və “Babamın babasının babası” (Tapdıq), “Tezə evlənənlər” (Rüstəm) bədii filmlərinə çəkilib.

Sabir Məmmədov 2002-ci ildə Azərbaycan Respublikasının Əməkdar Artisti fəxri adını qazanıb.

2005 və 2012-ci illərdə Prezident Mükafatına layiq görülüb.