Martın 13-də Bakıda, Muzey Mərkəzinin sərgi qalereyasında "Qədim Azərbaycan müasir gənclərin gözü ilə” adlı art festival açılıb.
Festivalda 14-29 yaşlı gənclərin heykəltəraşlıq, təkəlduz, dəmirçilik, qrafika, qravüra, keramika, xalçaçılıq, sərraclıq, misgərlik, qadın və kişi baş örtükləri, zinət əşyaları, musiqi alətləri, milli geyimlər üzrə işləri nümayiş olunur.
Art festivalın keçirilməsində məqsəd gənclərin Azərbaycanın milli-mədəni irsi haqqında məlumatlandırılması, eyni zamanda, adət-ənənələrin qorunub saxlanması və təbliğ edilməsidir.
Martın 16-dək davam edəcək festivalda Bakı şəhəri ilə yanaşı Sumqayıt, Şəki, İsmayıllı, Biləsuvar, Quba, Şəmkir, Gəncə və Mingəçevirdən dekorativ-tətbiqi sənət ustalarının əl işləri, xalq sənətkarlığı nümunələri nümayiş olunur.
Açılış mərasimində rəsmi şəxslər, müxtəlif ölkələrin səfirliklərinin əməkdaşları və gənclər iştirak ediblər.
Qeyd edək ki, tədbir Azərbaycan Respublikasının Prezidenti İlham Əliyevin 2015-ci il 26 yanvar tarixli Sərəncamı ilə təsdiq edilmiş "2015-2025-ci illərdə Azərbaycan gənclərinin İnkişaf Strategiyası”nın 5.2.3 bəndinin (gənclərin elm, texnika, mədəniyyət, incəsənət sahəsindəki bacarıqlarını və təşəbbüskarlığını stimullaşdıran tədbirlər həyata keçirmək) icrasını təmin etmək məqsədilə Gənclər və İdman Nazirliyi tərəfindən keçirilir.
Xəbərdən istifadə edərkən istinad etmək vacibdir.
