Sumqayıt şəhər
Əli Kərim adına Poeziya Evində görkəmli Qazaxıstan şairi və dramaturqu, tərcüməçi,
alim, Kostanay Dövlət Universitetinin professoru, "Media Mərkəz”in direktoru, Qazaxıstan
Yazıçılar İttifaqının Kostanay və Torqay vilayətləri üzrə məsləhətçisi Akılbek
Şayaxmet ilə dəyirmi masa ətrafında görüş keçirilib.
Xeberle.com-un verdiyi məlumata görə, açılışı
edən Poeziya Evinin direktoru İbrahim İlyaslı iştirakçıları salamlayaraq onlara
qonaq haqqında geniş məlumat verib. O, ortaq türkçəmiz olmadığından həm ölkəmizdə,
həm də ölkəmizdən kənarda türk xalqlarından olan qonaqlarımızı qarşılayarkən rus
dilində danışmaq məcburiyyətində qalmaqdan təəssüfləndiyini bildirib. Qazaxıstan-Azərbaycan
arasında ədəbi əlaqələrin və dostluq münasibətlərinin inkişafı zəminində baş tutan
görüşdə çıxış edən qazaxıstanlı qonaq İ.İlyaslıya öz təşəkkürlərini bildirib və
onu ədəbiyyatın sülh göyərçini adlandırıb. Qonaq Azərbaycanda ilk dəfə olduğunu, ölkəmizdən
şair Sabir Abdulla ilə eyni universiteti oxuduğunu və hələ də münasibətlərinin
qaldığını qeyd edib.
Görüşdə Azərbaycan
Yazıçılar Birliyinin Qubadlı Bölməsinin sədri Namiq Məna, şairlər Rafiq
Yusifoğlu, Əkbər Qoşalı, Almaz Bəyazid, Ehtiram İlham, Lilpar Cəmşidqızı,
Süleyman Hüseynov, Zümrüd Baloğlanova, Xatirə Fərəcli, Elvin Əlizadə, Qafqaz Əvəzoğlu,
Novruz Qələndərli, Rəfiqə Şəms, Xürrəm Qafarlı, Rəhilə Veysəlli, Elbrus Qayalı,
yazıçılar Arif Ərşad, Hümbət Quliyev və Cənubi Azərbaycan yazıçısı Osuli
iştirak ediblər. İştirakçıların hər biri çıxış edərək qonağı salamlayııblar və
ona müxtəlif hədiyyələr təqdim ediblər. Sonda İbrahim İlyaslı tərəfindən qazaxıstanlı
şair "Poeziya Evinin Fəxri Üzvü” adı ilə təltif olunub. Akılbek Şayaxmet isə öz növbəsində
İ.İlyaslıya Qazaxıstanın milli geyimini hədiyyə edib.
Qeyd edək ki,
Akılbek Şayaxmet 1951-ci il iyunun 17-də Jitikarinsky rayonunda Zabelovka kəndində
anadan olub. O, bir müddət "Zhetysu"
(Almatı) və "Kostanay tany" (Qostanay) qəzetlərində redaksiya şöbəsinin
müdiri vəzifəsində çalışıb. İlk kitabı 1977-ci ildə çap olunan A.Şayaxmet "Piramida”,
"Mənim orbitim”, "Çölün sədası” kimi 40-dan
çox kitabın müəllifidir. Onun "Aksulu" adlı dramatik poeması Qazaxıstan radiosunun qızıl fondunda
saxlanılır.
Elnarə Salamova
Xeberle.com
Xəbərdən istifadə edərkən istinad etmək vacibdir.
