Sumqayıtda uzun müddət bərpası üzərində iş aparılan və yenicə işıq üzü görmüş "Azərbaycan mətbəxi Qacarlar dövrünün bərpa edilmiş xörəkləri” kitabının təqdimat mərasimi keçirilib.
Müəllifləri Tahir Əmiraslanov, Oruc Əliyev, Ağakərim Şamidzadə, Bəyim Məmmədova, Aynurə Əmiraslanova, Mübariz Quliyev olan kitab Bakıda "Elm və təhsil” nəşriyyatında 2018-ci ildə çap edilmişdir. "Turan Park Restoran"da olan tədbirdə kitabın tərcüməçisi Rauf Şeyxzamanlı, kulinar Tahir Əmiraslanov nəşr nümunəsi barədə geniş məlumat verib. Qeyd edilib ki, adıçəkilən kitab Nadir Mirzə Qacarın "Karnamə” risaləsində verilən yeməklərin restavrasiya edilməsi nəticəsində ərsəyə gətirilib və bununla tarixdə ilk dəfə mətbəx düsturlarının, mətbəx kitabının restavrasiyası baş verib.
Təbrizin valisi Nadir Mirzə Qacar Bərdəli arvadı ilə birlikdə 1875-ci ildə yazmağa başladığı, 1883-cü ildə başa vurduğu "Karnamə” risaləsində 203 xörəyimiz barədə məlumat verir. Lakin xörəklərin düsturları (reseptləri) verilmir. Risalə əsasında 203 xörəyimiz bərpa edilib, hər xörəyə uyğun 2 yeni müasir texnologiyalara uyğun düstur işlənilib.
"Karnamə” risaləsi 2013-cü ildə tərəfimizdən AMEA-nın Milli Əlyazmalar İnstitutu ilə birlikdə tərcümə və nəşr edilmişdi. 5 il ərzində isə tərəfimizdən risalədə verilən Milli mətbəx nümunələrinin bərpası işi aparılıb.
Tədbirdə millət vəkilləri Qənirə Paşayeva, Adil Əliyev, icra başçısının müavini Teymur Səmədov iştirak edib. Onlar da turizmin inkişafında kulinariyanın mühim rolundan, bu kitabın əhəmiyyətindən söz açıblar.
Çıxış edən kitabın müəlliflərindən biri, "Turan” restoranının rəhbəri Mübariz Quliyev bildirib ki, kitab milli mətbəximizin yazılı abidəsi, sübutu olmaqla yanaşı, kitab həm də bugünkü restoran biznesi və əhali üçün istifadə edilə biləcək vəziyyətə gətirilib. Bu isə milli mətbəxin sistemləşdirilməsi, qorunması, təbliğatı və milli mədəni irsə aid edilməsini təmin etmək istiqamətində atılan vacib addımlardandır.
"Azərbaycan mətbəxi Qacarlar dövrünün bərpa edilmiş xörəkləri” kitabına elmi rəy Azərbaycan Dövlət İqtisad Universitetinin Qida Məhsulları Texnologiyası kafedrası tərəfindən verilib. Kitab Azərbaycan Dövlət Turizm Agentliyinin eqidası altında nəşr edilib. Nəşr xərcləri isə Azərbaycan Milli Kulinariya Assosiasiyasının sponsorları tərəfindən ödənilib. Tədbirin sonunda kitabın nəşri ilə bağlı göstərilən dəstəyə görə "Turan" restoranlar şəbəkəsinə təşəkkür edilib.
Xəbərdən istifadə edərkən istinad etmək vacibdir.
