Sumqayıt Regional Mədəniyyət İdarəsi cari məsələlərlə bağlı onlayn müşavirə keçirib
Xeberle.com-a verilən məlumata görə, martın 1-də keçirilən onlayn müşavirədə Sumqayıt Regional Mədəniyyət İdarəsinin rəisi Rəşad Əliyev, idarənin tabeli qurumlarının müəssisə rəhbərləri iştirak edib.
Tədbirdə çıxış edən rəis, Nazirlər Kabinetinin müvafiq sərəncamı ilə təsdiq edilən "Azərbaycan Respublikasında COVID-19 xəstəliyi əleyhinə 2021-2022-ci illər üçün Vaksinasiya Strategiyası”na əsasən dövlət tibb müəssisələrində əhalinin profilaktik vaksinasiyasının dövlət hesabına aparıldığını və yaşı 50-dən yuxarı olan mədəniyyət işçilərinin vaksinasiyaya cəlb edilməsi üçün düzgün maarifləndirmə tədbirlərinin təşkilinin vacibliyindən söz açıb. O, Ölkə başçısı cənab İlham Əliyevin yürütdüyü siyasətin mərkəzində Azərbaycan vətəndaşı, onun qayğılarının dayandığını və ölkəmizin hələ sentyabr ayında Ümumdünya Səhiyyə Təşkilatı tərəfindən yaradılan COVAX platformasına qoşulduğunu qeyd edib. Hazırda təkcə Sumqayıt şəhərində 8 tibb müəssisəsində vaksinasiyanın yüksək səviyyədə aparıldığını bildirib. Bütün müəssisə rəhbərlərini COVID-19-a qarşı aparılan kütləvi peyvəndləşmədə maksimum aktivlik göstərməyə çağırıb.
R.Əiyev idarənin iş planına uyğun olaraq, planlaşdırılan tədbirlərin onlayn şəkildə, yüksək səviyyədə həyata keçirilməsini və verilən tapşırıqların vaxtında icra olunmasını tövsiyə edib. İdarə rəisi deyib ki, sosial media ilə işin qurulmasında operativliyi artırmaq, mövcud çağırışlara uyğunlaşmaq, onlayn tədbirlərin keyfiyyətini və auditoriyasını genişləndirmək vacibdir.
Daha sonra rəis, müşavirə iştirakçılarına rəhbərlik etdikləri müəssisələrin təsərrüfat fəaliyyətinə ciddi riayət etməyi, dövlət əmlakının qorunmasına, inventar və avadanlıqların saxlanılmasına məsuliyyətlə yanaşmağı, virusa yoluxma hallarının qarşısının alınması məqsədi ilə xüsusi sanitar-profilaktik tədbirlərin görülməsini tapşırıb.
Xəbərdən istifadə edərkən istinad etmək vacibdir.
