2 fevral Azərbaycan Gənclər Günü ilə əlaqədar Sumqayıt Regional Mədəniyyət İdarəsinin rəisi Rəşad Əliyev gəncləri qəbul edib.
Səmimi keçən görüş zamanı idarə rəisi vurğulayıb ki, Azərbaycanda gənclər siyasətinin təməli ümummilli lider Heydər Əliyevin ideyaları əsasında formalaşıb və bu gün cənab Prezident İlham Əliyevin davam etdirdiyi həmin siyasətin nəticəsində gənclərimiz ölkəmizin aparıcı qüvvəsinə çevrilib.
Rəşad Əliyev gənc mədəniyyət işçilərini dövlətimizin tərəqqisi naminə Prezident İlham Əliyevin ətrafında sıx birləşməyə, vətənpərvər və məsuliyyətli olmağa çağırıb.
O həmçinin mədəniyyət sahəsinin inkişafı ilə bağlı hər bir müəssissə əməkdaşını yeni reallığın tələblərinə uyğunlaşmağa - təşəbbüskar, kreativ ideyalarla çıxış edən, tapşırıqlara, tələblərə operativ yanaşmağa səsləyib.
Azərbaycan gəncləri üçün ən həlledici sınaqlardan biri - 44 günlük Vətən müharibəsində Vətən uğrunda mətanətlə vuruşan, adlarını xalqımızın ən yeni tarixinə qızıl hərflərlə yazan qəhrəman gənclərimizin rəşadəti sayəsində Azərbaycanın ərazi bütövlüyünün bərpa olunduğunu, xalqımız otuz illik həsrətdən sonra tarixi torpaqlarına qovuşduğunu qeyd edərək, bu döyüşlərdə həlak olan şəhidlərə Allahdan rəhmət diləyib, yaralananların isə tezliklə sağalmasını arzulayıb. Arxa cəbhədə də gənclərin yüksək fəallıq göstərdiyini, ölkəmizlə bağlı həqiqətlərin, işğalçı rejimin əzəli torpaqlarımızda törətdikləri vandallıq aktlarının beynəlxalq ictimaiyyətin diqqətinə çatdırılmasında fəal iştirak etdiklərini vurğulayıb.
O, mədəniyyət işçiləri tərəfindən neqativ hallara qarşı mübarizə aparılmasının, yeniyetmə və gənclərin asudə vaxtlarının səmərəli təşkilinə nail olunmasının, onların sağlam mühitdə böyümələri, tərbiyə və təhsil almaları məqsədilə davamlı olaraq mədəniyyət müəssisələrində müxtəlif məzmunlu maarifləndirici tədbirlərin və layihələrin keçirilməsinin vacibliyini qeyd edib.
Sonda bir daha gəncləri təbrik edən idarə rəisi, onlara yeni-yeni nailiyyətlər, qarşıya qoyduqları məqsədlərə nail olmağı arzulayıb və fəxri fərmanlar təqdim edib.
Səmimi görüşə və göstərilən diqqətə görə təşəkkür edən gənc mədəniyyət işçiləri bundan sonra da mədəniyyət sahəsinin inkişafına öz töhfələrini verəcəyini və bu istiqamətdə yeni uğurlara imza atacaqlarını bildiriblər.
Xəbərdən istifadə edərkən istinad etmək vacibdir.
