Azərbaycan Respublikası Mədəniyyət Nazirliyi, Sumqayıt Regional Mədəniyyət İdarəsi və "Yarat" Müasir İncəsənət Məkanımın birgə təşkilatı dəstəyi ilə Sumqayıt Dövlət Rəsm Qalereyasında "YARAT" Müasir İncəsənət Məkanı, yerli rəssam və fotoqrafların əsərlərindən ibarət "Dumanlar başımda dastana döndü” adlı qrup sərgisi təqdim edilib. Vətən Müharibəsi şəhidi Xudayar Yusifzadənin özünəməxsus ifasında sevilən "Vətən yaxşıdır” mahnısından götürülən sərginin adı həmçinin nümayiş olunan Rəşad Ələkbərovun instalyasiyasının tərkib hissəsidir. Ekspozisiyada Ağababa Bağırov, Elnur Babayev, İlqar Cəfərov, Şahvələd Eyvazov, Erkin Ələkbərov, Rəşad Ələkbərov, Xalid Əsgərov, Mirnaib Həsənoğlu, Əli Qaffarov, Cavid Qurbanov, Oleq Litvin, Əli Rza, Zamir Hüseynov və Nurəhməd Vəliyev kimi rəssam və fotoqrafların instalyasiyasının fotoqrafiya, video və rəqəmsal sənət əsərləri bir-birilə dialoqa girərək artıq həll olunan Qarabağ münaqişəsinin mürəkkəb pazlını tamamlayır. Ekspozisiyaya YARAT Müasir İncəsənət Məkanı və Azərbaycan Fotoqrafları Birliyinin fondlarında saxlanılan əsərlər və fotomateriallar daxil edilib.
Sərgidə Sumqayıt Regional Mədəniyyət İdarəsinin rəisi Rəşad Əliyev çıxış edərək bildirib ki, YARAT Müasir İncəsənət Məkanının yerli rəssam və fotoqrafların əsərlərindən ibarət "Dumanlar başımda dastana döndü” adlı səyyar sərgisi bu gün Sumqayıt şəhərində nümayiş olunur. Sərgi 30 ilə yaxın davam edən Qarabağ münaqişəsi və Azərbaycan Ordusunun, xalqımızın qələbəsi ilə başa çatan Zəfərimizə həsr olunur. Biz xoşbəxt xalqıq ki, uzaqgörənliyi, yüksək idarəçilik qabiliyyəti ilə Vətən Müharibəsində düşməni məğlub edib, rəzil günə salaraq Azərbaycanı möhtəşəm zəfərə çatdıran, xalqımızın böyüklüyünü, qürurunu qaytaran İlham Əliyev kimi müdrik liderimiz var.
Məhz Müzəffər Ali Baş Komandan İlham Əliyevin rəhbərliyi rəşadətli Azərbaycan Ordusu dövlətimizin tarixinə xalqımızın əsrlər boyu həsrətində olduğu şanlı Zəfər Bayramını yazdı. Uzun illlər qaçqın və məcburi köçkün həyatı yaşamağa məcbur olan azərbaycanlıların əyilmiş qəddi düzəldi, xəyal qırıqlığı yaşayan Azərbaycan xalqı qürur hissinin, qalib dövlətin vətəndaşı olmağın mahiyyətini bütün varlığı ilə duydu və yaşadı.
Sumqayıt, hər iki Qarabağ müharibəsi zamanı, işğal altında olan ərazilərin azadlığı uğrunda ən çox şəhid vermiş şəhərlərdən biridir. Sumqayıtın ümumilikdə 800 nəfərdən çox şəhidi olmuşdur.
YARAT-ın bu məkanda sərgilədiyi "Dumanlar başımda dastana döndü” adı altında birləşən qrup sərgisi müharibə təfərrüatlarının və siyasi münaqişələrin travmatik yaddaşını gündəmə gətirir. İnanırıq ki, bu sərgi Sumqayıt şəhərində müasir incəsənət və incəsənət təhsilinin inkişafına, yeni layihələrin həyata keçirilməsinə dəyərli töhfə verəcəkdir.
YARAT-ın təsisçisi və bədii rəhbəri Aida xanım Mahmudova başda olmaqla, sərginin təşkilində əməyi keçən hər kəsə təşəkkür edir və uğurlar diləyirəm.
Əminik ki, arelin 22-dək davam edəcək bu sərgi Sumqayıt sakinləri və şəhərimizin qonaqlarının böyük marağına səbəb olacaqdır.
Daha sonra YARAT-ın baş kuratoru Fərəh Ələkbərli "Dumanlar başımda dastana döndü”adlı səyyar sərgi barədə ətraflı məlumat verib.
Sərgidə Sumqayıt Regional Mədəniyyət İdarəsinin tabeliyində olan mədəniyyət müəssiələrinin direktor və kollektivləri, Sumqayıt şəhər rəssamları,yazıçılar və şairlər, KİV- nümayəndələri iştirak ediblər.
Sonra tədbir iştirakçıları kolleksiya ilə tanış olublar.
Xəbərdən istifadə edərkən istinad etmək vacibdir.
