Sumqayıt Dövlət Dram Teatrı teatr mövsümünün sonunda gərgin iş rejimində çalışır. Bu günlərdə teatrın kiçik səhnəsində Ülviyyə Heydərovanın "Uşaqlıq” monopyesi Xalq artisti Firudin Məhərrəmovun quruluşunda növbəti dəfə nümayiş olunub.
Teatrdan Xeberle.com-a bildirilib ki, eyni zamanda, Rövşən Ağayevin "Bir gecənin nağılı” əsərinin tamaşasına baxış keçirilib. Tamaşanın quruluşçu rejissoru Gülnar Hacıyeva, quruluşçu rəssam Elşən Sərxanoğlu, plastik həlli isə Vüsal Mehrəliyevə məxsusdur. Tamaşa iki gəncin təsadüfi görüşü üzərində qurulub. Fərqli xarakterə malik bu gənclər tamaşa boyu gərgin psixoloji hallardan keçirlər. Onlar ictimai-sosial mühitdə müşahidə olunan bir çox neqativ epitetlərə qarşı çıxaraq, sonda eyni hissləri bölüşürlər. Gənclərin həyatından bəhs edən bu tamaşanın premyerası iyulun 8-nə planlaşdırılıb.
İyulun 6-da isə son məşqləri gedən Üzeyir Hacıbəylinin "O olmasın, bu olsun” əsərinin tamaşasına baxış keçiriləcək. Tamaşanın quruluşçu rejissoru Əməkdar artist Namis Şirməmmədov, quruluşçu rəssamı Elşən Sərxanoğludur. Tamaşada teatrın yaşlı və orta nəsil aktyorları ilə yanaşı, gənc aktyorlar da yer alıblar.
Teatr mövsümünün bağlanışı iyulun 13-də "Xəzinə” tamaşasının nümayişi ilə yekunlaşacaq. Xalq artisti Firudin Məhərrəmovun quruluşunda Nizami Gəncəvinin "880 illik” yubileyi çərçivəsində dövlət sifarişi əsasında hazırlanan bu tamaşa Nizami Gəncəvinin "Xəmsə” əsərinin motivləri əsasında Hafiz Ataxanlının müəllifliyi ilə ərsəyə gəlib. Quruluşçu rəssam Elşən Sərxanoğlu, rəssam Nizami Dadaşov, musiqi tərtibatı sənətşünaslıq üzrə fəlsəfə doktoru Telman Qəniyev, plastik həlli Vüsal Mehrəliyevə məxsusdur.
Xəbərdən istifadə edərkən istinad etmək vacibdir.
